ბათუმის დრამატულმა თეატრმა, პოლიტიკისგან გამიჯვნის მოტივით, გეგა გაგნიძის სპექტაკლი გააუქმა. სოციალურ ქსელში გამოქვეყნებულ განცხადებაში თეატრი წერს, რომ რეჟისორი "სპექტაკლში სუბიექტური პოლიტიკური აქტის განხორციელებას გეგმავდა", "ბათუმის დრამატული თეატრი კი კატეგორიულად ემიჯნება თეატრის სივრცის პოლიტიზებას".

"მიმდინარე წლის 7-8 თებერვალს, ბათუმის დრამატულ თეატრში დაგეგმილი იყო სპექტაკლის DARK WEB პრემიერა.

საპრემიერო ჩვენებიდან ორი დღით ადრე, თეატრის ადმინისტრაციისთვის ცნობილი გახდა, რომ რეჟისორი გეგა გაგნიძე, თეატრის დიდ სცენაზე, სპექტაკლში გეგმავდა სუბიექტური პოლიტიკური აქტის განხორციელებას.

ხაზგასმით აღვნიშნავთ, რომ ბათუმის დრამატული თეატრი კატეგორიულად ემიჯნება თეატრის სივრცის პოლიტიზებას. პოლიტიკის შემოტანა სცენაზე სცილდება ხელოვნების ჩარჩოებს და ემსახურება მხოლოდ და მხოლოდ კონკრეტულ პოლიტიკურ კონტექსტს.

შესაბამისად, დაგეგმილი სპექტაკლი რომლის შინაარსიც არ შეესაბამება აღნიშნულ პრინციპებს, უქმდება.

ბათუმის დრამატული თეატრი კვლავ გააგრძელებს მაყურებლისთვის მაღალი მხატვრული ღირებულების მქონე სპექტაკლების შეთავაზებას და დარჩება კულტურისა და ხელოვნების სივრცედ, თავისუფალი პოლიტიკური გავლენებისგან.

ბოდიშს ვუხდით ჩვენს მაყურებელს აღნიშნული დისკომფორტისთვის. შეძენილი ბილეთების თანხა მაყურებელს სრულად დაუბრუნდება", — წერია მათ მიერ გავრცელებულ ინფორმაციაში.