5 თებერვალს, 27 წლის მიშო ქავთარაძე მკვლელობის საქმეზე ორი გდდ-ს თანამშრომელი დააკავეს — ინფორმაციას ტვ პირველი ავრცელებს. პროკურატურამ NEWS.On.ge-ს უწყების თანამშრომლების დაკავება დაუდასტურა. უწყების თანამშრომელბს ჯგუფური ძალადობის ბრალდებით წაუყენეს.

გარდაცვლილის დედამ ტვ პირველთან საუბრისას განაცხადა, რომ მკლელობა ერთი წლის წინ მოხდა და ამ დროის განმავლობაში თანამშრომლები სამსახურეობრივი მოვალეობის შესრულებას განაგრძობდნენ.

"მადლობა, რომ დააკავეს, ერთი წლის შემდეგ, მადლობა, რომ გაახსენდათ, ან აქამდე რატომ არ იყვნენ დაკავებულები. დაკავებულები არიან ჯგუფურ ძალადობაზე და არა მკვლელობის თანამონაწილეობაზე. ვითხოვ, აუცილებლად გადაკვალიფიცირდეს ბრალი. გამწარებულ დედას წინ ვეღარავინ ვეღარ დაუდგება. ნამდვილად აღარ მოვტყუვდები.

ძალადობაა მხოლოდ? თავიდანვე გამოძება არ წარიმართა სწორად. თავიდანვე რომ დაეკავებინათ ყველა თანამონაწილე, ნივთმტკიცებულებასაც იპოვნიდნენ და ყველაფერს გაარკვევდნენ. სამწუხაროდ, ჩაიფარცხა. უნდოდათ, რამენაირად გამომძვრალიყვნენ გდდ-ს თანამშრომლები.

მეორე-მესამე დღეს აბსოლუტურად ყველაფერი მოშორებული ჰქონდათ. კადრებში ჩანს მშვენივრად. ბოლო კადრი, როცა თავისი ძმა [გოგიძე] აკეთებს ორგანიზებას, ვინ საით გაქცეულიყო. რომ არა თორნიკე გოგიძე, დღეს ჩემი შვილი აქ იქნებოდა.

დაჭრილს, უგონოდ მყოფ ჩემს შვილს ზედ აჯდება და სასიკვდილოდ, გამეტებით ურტყამს. იმ დღესვე უნდა დაეკავებიათ თორნიკე გოგიძე და არა ერთი წლის თავზე.

დაკავება კი არა, კიდევ ძალიან დიდხანს სამსახურეობრივ მოვალეობას ასრულებდა და სახელმწიფოს ემსახურებოდა ეგ მოძალადე მკვლელი. რამდენიმე არის კიდევ გარეთ და ვითხოვ მათ დაკავებასაც. ვის რა მუხლი ეკუთვნის, იმის მიხედვით უნდა დაისაჯოს ყველა," — განაცხადა გარდაცვლილის დედამ.

დღეს, თბილისის საქალაქო სასამართლოში მკვლელობის საქმეზე სასამართლო პროცესი გაიმართა. პროკურატურის ვერსიით, ბრალდებულებიდან ერთ-ერთი დაჭრილს ზემოდან დააჯდა და ურტყამდა. სასამართლომ დააკმაყოფილა პროკურატურის შუამდგომლობა და ბრალდებულები წინასწარ პატიმრობაში გაუშვა.