აქამდე უცნობი ფეხის ესკიზი, რომელიც მიქელანჯელოს მიეწერება, აუქციონზე 23 მილიონ დოლარად გაიყიდა, რაც საწყის შეფასებას ათჯერ აჭარბებს.

Christie's-ს ექსპერტების თქმით, ნახატი წარმოადგენს ლიბიის სიბილას ფეხის ესკიზს, იმ ფიგურისას, რომელიც მოგვიანებით სიქსტეს კაპელას ჭერზე იქნა დახატული.

ფოტო: Christie's

აუქციონის სახლის ცნობით, მფლობელმა თავდაპირველად მხოლოდ ფოტოსურათი გაგზავნა შეფასებისთვის და სწორედ მაშინ გაირკვა ნამუშევრის რეალური ღირებულება. Christie's-ის ძველი ოსტატების განყოფილების გლობალურმა ხელმძღვანელმა, ენდრიუ ფლეტჩერმა, აღმოჩენას "კარიერის ერთ-ერთ ყველაზე დასამახსოვრებელი მომენტი" უწოდა.

პატარა ზომის, წითელი ცარცით შესრულებული ესკიზი სავარაუდოდ 1511–1512 წლებით თარიღდება, პერიოდით, როცა მიქელანჯელო სიქსტეს ჭერის მეორე ნაწილზე მუშაობისთვის ემზადებოდა, მათ შორის ლიბიის სიბილას ფიგურაზე.

მიქელანჯელოს მიერ შესრულებული ლიბიის სიბილა სიქსტეს კაპელის ჭერზე

ფოტო: Wikipedia

ანონიმური მფლობელი, რომელიც აშშ-ის დასავლეთ სანაპიროზე ცხოვრობს, ამბობს, რომ ნახატი ბებიისგან მიიღო და იგი ოჯახში XVIII საუკუნის ბოლოდან თაობიდან თაობას გადაეცემოდა.

Christie's-ის ძველი ოსტატების ნახატების დეპარტამენტის სპეციალისტმა, ჯიადა დამენმა, ინფრაწითელი რეფლექტოგრაფია გამოიყენა. ამან ფურცლის უკანა მხარესაც გამოავლინა ჩანახატები, რომლებიც ასევე მიქელანჯელოს სტილს ჰგავდა. შემდეგ მან ეს ესკიზი Metropolitan Museum of Art-ში დაცულ მიქელანჯელოს ნახატს შეადარა და დაასკვნა, რომ ნამუშევარი ორიგინალია.

მილიონებად გაყიდული ხელოვნება უჩვეულო არ არის:

  • 2017 წელს 500 წლის წინ შექმნილი ქრისტეს პორტრეტი, რომელიც ლეონარდო და ვინჩის მიეწერება, რეკორდულ $450 მლნ-ად გაიყიდა;
  • 2025 წლის ნოემბერში ავსტრიელი მხატვრის გუსტავ კლიმტის მიერ შესრულებული ელიზაბეტ ლედერერის პორტრეტი $236.4 მლნ-ად გაიყიდა ნიუ-იორკში;
  • იმავე თვეში მექსიკელი სიურრეალისტის, ფრიდა კალოს ნამუშევარმა $54.7 მლნ შეადგინა და ქალ ავტორთა ნამუშევრებისთვის აუქციონზე რეკორდი დაამყარა.