"რატის ბარში" 18 წლის ალეკო შაკიაშვილის მკვლელობისთვის ბრალდებულს, ივანე გიგლემიანს უვადო პატიმრობა მიესაჯა — გადაწყვეტილება მოსამართლე თამარ მჭედლიშვილმა მიიღო.

შემთხვევა 2025 წლის 11 მაისს მოხდა. 37 წლის ივანე გიგლემიანმა 18 წლის ახალგაზრდას სხეულის სხვადასხვა არეში ჭრილობები დანით მიაყენა, რის შედეგადაც ის ადგილზევე გარდაიცვალა.

2025 წლის 13 მაისის სასამართლო პროცესზე საქმის პროკურორმა, გია შაიშმელაშვილმა დანაშაულის ჩადენის გარემოებებზე ისაუბრა. პროკურორის თქმით, 18 წლის ბიჭმა გიგლემიანს შემთხვევით მხარი გაკრა, რის შემდეგაც ის ოთახში შეიყვანა და ცივი იარაღით ჭრილობები მიაყენა. შემთხვევის შემდეგ ბრალდებული სუფრას დაუბრუნდა და დაჭრილი 18 წლის ბიჭი ოთახში დატოვა.

"18 წლის ბიჭმა გვერდით ჩავლისას უბრალოდ მხარი გაჰკრა, მხოლოდ ამ მიზეზით შეიყვანა ოთახში და დანით სხეულზე მიაყენა დაზიანებები. ამის შემდეგ დაჭრილი მიატოვა, გამოვიდა, დაბრუნდა თავის სუფრასთან. მეორე ბრალდებულს, რომელსაც ბრალი წაყენებული აქვს დანაშაულის შეუტყობინებლობისთვის, უთხრა ჩადენილი ქმედების შესახებ, რის შემდეგაც ორივე მიიმალა შემთხვევის ადგილიდან.

დაჭრილი ბიჭი იქ მყოფმა სხვა ადამიანებმა ამოიყვანეს ბარიდან, გამოიყვანეს გარეთ, ჰაერზე, გამოიძახეს სასწრაფო სამედიცინო დახმარებაც, მაგრამ ჭრილობები ისეთი განლაგებით არის მიყენებული, რომ მისი გადარჩენა ვერ მოხერხდა," — განაცხადა პროკურორმა.

აღნიშნულ საქმეზე 3 წლით თავისუფლების აღკვეთა 46 წლის რაჯი პაკელიანსაც მიესაჯა, მას დანაშაულის შეუტყობინებლობა ედებოდა ბრალად.

"რადიო თავისუფლების" ინფორმაციით, 37 წლის ივანე გიგლემიანი წარსულშიც მძიმე დანაშაულისთვისაა ნასამართლები. გიგლემიანი 2007 წელს 18 წლის ახალგაზრდის მკვლელობისთვის დააკავეს და 27 წლით თავისუფლების აღკვეთა მიუსაჯეს.

დღევანდელი განაჩენის გამოცხადების შემდეგ, სოციალურ ქსელში მოქალაქე დოდო მაისურაძე სოციალურ ქსელში წერს, რომ გიგლემიანმა მისი 18 წლის შვილი, ლაშა რუბაშვილი მოტივის გარეშე ცეცხლსასროლი იარაღით მოკლა. გარდაცვლილის დედა 2025 წლის 12 მაისს წერდა, რომ გიგლემიანს 2017 წელს ამნისტია შეეხო და საპატიმრო დატოვა.

ივანე გიგლემიანის განაჩენის გამოცხადების შემდეგ დოდო მაისურაძემ კვლავ გაიხსენა 2017 წელს მომხდარი და სოციალურ ქსელში დაწერა, რომ გიგლემიანმა შვილი მოუკლა, 27 წელი მიუსაჯეს, ამნისტია შეეხო, 7 წელიწადში გამოვიდა და "დაუსჯელობით გათამამებულმა 18 წლის უკარგეს ბიჭს, სტუდენტს, "რატის ბარში" ბეჭის გაკვრის გამო ყელი გამოჭრა".

"ეს ის მკვლელი ივანე გიგლემიანია, რომელმაც ჩემი 18 წლის შვილი ლაშა რუბაშვილი სრულიად უდანაშაულო მომიკლა ავტომატის ჯერით. 27 წელი მიუსაჯეს, ამნისტია შეეხო და 7 წელიწადში გამოვიდა. დაუსჯელობით გათამამებულმა 18 წლის უკარგეს ბიჭს სტუდენტს "რატის ბარში" ბეჭის გაკვრის გამო ყელი გამოჭრა. სამართალმა იზეიმა. მისი სიკვდილი არ მინდა. მან უნდა იტანჯოს ჩვენი შვილების ცოდვით. კიდევ იმიტომ რომ მე და ამ ბიჭის დედას ცხოვრება ჯოჯოხეთად გვიქცია. მადლობა ყველას ვინც ეს საქმე განიხილა და თავიანთი გადაწყვეტილებით მრავალი დედა დაიფარა ჩვენნაირი ბედისაგან. სამართალმა იზეიმა. დიდება უფალს," — წერს დოდო მაისურაძე.

აღნიშნულ თემაზე "რადიო თავისუფლებამ" გიგლემიანის ადვოკატს, გიორგი ბარდაველიძეს მიმართა. ადვოკატის მტკიცებით, მისი დაცვის ქვეშ მყოფმა საპატიმრო ამნისტიის საფუძველზე არ დატოვა და მას "შეკრებითობის პრინციპი" შეეხო.

"აქ საუბარია იმაზე, რომ წინა ხელისუფლების დროს, სასჯელის დანიშვნისას მოქმედებდა შეკრებითობის პრინციპი. ეს პრინციპი შემდგომ შთანთქმის პრინციპით შეიცვალა. აქ ამნისტიაზე არ არის ლაპარაკი. შთანთქმის პრინციპის ამოქმედების შემდეგ, თუკი ბრალდებულის მდგომარეობას აუმჯობესებს კანონი, ამ კანონის საფუძველზე უნდა მოხდეს განაჩენის კორექტირება.

ვიმეორებ, აქ არ არის ლაპარაკი იმაზე, რომ მკვლელობაში მსჯავრდებულს ამნისტია შეეხო. როდესაც შეკრებითობის პრინციპი გაუქმდა, მოხდა სასჯელის შემსუბუქება და ასე მოხდა მისი სასჯელის 10 წლამდე დაყვანა," — განაცხადა ადვოკატმა.