ერთიანი ნაციონალური მოძრაობის ერთ-ერთმა ლიდერმა, ლევან ხაბეიშვილმა დღეს გამართულ სასამართლო პროცესზე განაცხადა, რომ მას ანგარიშები დაუყადაღეს და ოცნების პარლამენტის ვიცესპიკერ თეა წულუკიანის საჩივრის საფუძველზე 9 000-ლარიანი ჯარიმა დაეკისრა.

"მე მინდა საზოგადოებამ გაიგოს, რომ ნახევარი წელი შესრულდება მალე და ჩემი სასამართლო სხდომა ერთადერთი იყო როცა მიეცა საშუალება ჩემს დაცვის მხარეს და მათ შორის მეც, სიტყვები რომ ითქვა, მას შემდეგ ჩემი სასამართლოს სხდომა არ ტარდება, მოვდივარ იმიტომ, რომ მენატრება ჩემი ახლობლები, მოვდივარ, მივდივარ... ეს სამი კაცი [მოწმე] რომ მოიყვანოს მოსამართლემ, სხდომა რომ დაიწყოს 10 საათზე, 15 საათზე დაამთავრებს... ჯერ რა მოწმე უნდა იყოს, მართლა მაინტერესებს ჩამოვიდნენ ჩამხედონ თვალებში და სასამართლომ ჩახედოს თვალებში, რა უნდა ილაპარაკოს ამ ხალხმა [მოწმეებმა]? როგორ იყვნენ შეურაცხყოფილები? ვითხოვ ჩემს სასამართლო პროცესს.
20 თებერვალს ხომ გვაქვს მომდევნო სასამართლო? გამაგებინეთ 20-ში მაინც მოგყავთ [მოწმე]? ასე უსასრულოდ ხომ არ შეიძლება გაიწელოს?

მეორე საკითხი, გუშინ ვუყურებდი, რომ აქტივისტებს ყადაღა დაადესო, ციხეში დამაყადაღეს ადმინისტრაციული წესით, ციხეში გამომიგზავნეს 9 000 ლარის ჯარიმა, რომ თურმე წულუკიანს არ მოეწონა რაღაცა რომ ვთქვი, 9000 ლარი...
ჯერ ხომ დამატყვევეს და სასამართლოს პროცესის საშუალება არაა, მოწმე არ მოჰყავთ, ნახევარი წელი ციხეში, ტელეფონი არა, შვილები არა, არაფერი არა, 9000 ლარი ჯარიმა გამომიგზავნეს ციხეში," — განაცხადა ხაბეიშვილმა. (ტექსტი "პუბლიკა")

2025 წლის 25 ივნისს თეა წულუკიანმა და ნინო წილოსანმა ლევან ხაბეიშვილს შეურაცხყოფის მიყენებისთვის უჩივლეს და სასამართლომ ხაბეიშვილი 4000 ლარით დააჯარიმა.

ხაბეიშვილის განცხადებით, მაშინ მას ფეისბუქ-პოსტისთვის უჩივლეს, სადაც დაწერა: "თეა წულუკიანს ენას ამოვაგლეჯ", ნინო წილოსანი კი "ნაძირალას" დაძახებას ედავებოდა.

შეგახსენებთ, ერთიანი ნაციონალური მოძრაობის პოლიტსაბჭოს თავმჯდომარე ლევან ხაბეიშვილი 11 სექტემბერს დააკავეს. მას ბრალად ედება "ქრთამის მიცემა — უკანონო ქმედების ჩასადენად" , რაც 4-დან 7 წლამდე პატიმრობას ითვალისწინებს. მოგვიანებით ლევან ხაბეიშვილს, 4 ოქტომბრის საქმესთან დაკავშირებით, ახალი ბრალი წაუყენეს — კონსტიტუციური წყობილების დამხობის მცდელობა.

ცნობისთვის, მურთაზ ზოდელავას, პაატა ბურჭულაძეს და ირაკლი ნადირაძეს 3 მუხლით წაუყენეს ბრალი: სტრატეგიული და განსაკუთრებული მნიშვნელობის ობიექტების ხელში ჩაგდება და ბლოკირების მცდელობის ჩადენილი ჯგუფურად; ჯგუფური ძალადობის ორგანიზება და ხელმძღვანელობა და მოწოდება საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ.