იტალიაში ზამთრის 25-ე ოლიმპიური თამაშებისთვის მზადება დასასრულს უახლოვდება. მასშტაბური სპორტული ფესტივალი სტარტს 6 თებერვალს აიღებს. თუმცა, ოლიმპიადის დაწყებამდე, სპორტული საზოგადოების ყურადღება მედიაში გავრცელებულმა ინფორმაციამ მიიქცია: გერმანული ტაბლოიდის ცნობით, ტრამპლინიდან თხილამურებით მხტომელები კონკურენტული უპირატესობის მოსაპოვებლად "პენისებს" იზრდიან.

გაზეთი Bild ამტკიცებს, რომ სპორტსმენები ჰიალურონმჟავის ინიექციას იკეთებენ, რათა უბის მიდამოს გაზრდით უფრო მაღლა ახტნენ. როგორც ირკვევა, აეროდინამიკული ასპექტით, მხტომელებისთვის კომბინეზონის ზომას მნიშვნელობა აქვს — რაც უფრო დიდია კოსტიუმი, მით მეტად მომგებიან მდგომარეობაში აყენებს სპორტსმენს.

ერთ-ერთი კვლევის თანახმად, კომბინეზონის გარშემოწერილობის ყოველი 2 სანტიმეტრის გაზრდით, გრავიტაციული წინააღმდეგობა 4%-ით მცირდება და ხტომა 5%-ით მაღლდება; უფრო ზუსტად, კოსტიუმის 2სმ-იან ცვლილებას 5,8-მეტრიანი უპირატესობის მოცემა შეუძლია.

კოსტიუმების შესაკერად, სპორტის ამ სახეობაში მოასპარეზეებს ყოველი სეზონის წინ 3D სკანერის გამოყენებით უღებენ ზომებს. კომბინეზონი ზუსტად უნდა იმეორებდეს სპორტსმენის გარშემოწერილობას. Bild-ის მტკიცებით კი, მხტომელები სამოსის ზომის გასაზრდელად სხვადასხვა გზას მიმართავენ, მათ შორის, საცვალში თიხის ჩადებას და საეჭვო ნივთიერების შეშხაპუნებას, არც მეტი, არც ნაკლები, პენისებში.

გაზეთში ექიმის განცხადებაცაა მოყვანილი, სადაც ნათქვამია, რომ პარაფინისა და ჰიალურონმჟავის გამოყენებით ნამდვილად არის შესაძლებელი, პენისმა ზომაში დროებით მოიმატოს, თუმცა, ამგვარი ინიექციები სამედიცინო თვალსაზრისით გაუმართლებელია და გარკვეულ რისკებთანაა დაკავშირებული.

თუმცა, სკანდალურმა ცნობებმა მედია ისე მოიცვა, რომ საკითხით მსოფლიოს ანტი-დოპინგური სააგენტოც (WADA) კი დაინტერესდა. ორგანიზაციის პრეზიდენტმა, პოლონელმა ვიტოლდ ბანკამ, პირობა დადო, რომ ამბავს აუცილებლად მოიკვლევს, რადგან თავის სამშობლოში ტრამპლინიდან თხილამურებით ხტომა სპორტის პოპულარული სახეობაა.

"თავად არ ვიცნობ ამ სპორტის სპეციფიკას კარგად და არ ვიცი, რამდენად არის შესაძლებელი, ხტომის გაუმჯობესება ასე", — აღნიშნა WADA-ის გენერალურმა დირექტორმა ოლივიე ნილიმ პრესკონფერენციაზე, — "თუკი რამე გამოაშკარავდება, ამას მოვიკვლევთ და ვნახავთ, რამდენად არის დოპინგთან დაკავშირებული. ხტომის გაუმჯობესების არადოპინგურ მეთოდებზე კი ჩვენ ვერ ვიმოქმედებთ".

აღსანიშნავია, რომ გასულ წელს, მსოფლიო სათხილამურო ჩემპიონატზე, ორ ნორვეგიელ მხტომელს, ოლიმპიურ ჩემპიონებს, შეჯიბრებებზე ასპარეზობა დროებით აეკრძალათ. მიზეზი მაშინაც მსგავს მანიპულაციას უკავშირდებოდა, რაც მოგვიანებით მწვრთნელმაც დაადასტურა: გავრცელდა ვიდეო, როგორ ცდილობდა ნორვეგიის გუნდი სპორტსმენების კოსტიუმების ზომის შეცვლას უბის არის გაზრდით.