პოლიტიკური პარტია გირჩი უკრაინაში დაკავებული ქართველი ჯარისკაცის გია ცერცვაძის თემაზე განცხადებას ავრცელებს და ხელისუფლებას მოთხოვნებით მიმართავს.

გირჩის თქმით, ინტერპოლის წევრი სახელმწიფოები ინფორმაციებს ნებაყოფლობით საფუძველზე ცვლიან, რაც საპოლიციო თანამშრომლობის მიზნებისთვის ხელთ არსებული ინფორმაციის სავალდებულო გაცვლას არ ითვალისწინებს.

"ინტერპოლის ვებ-გვერდზე მოძიებული ინფორმაციის თანახმად ირკვევა, რომ "ინტერპოლის წევრი სახელმწიფოები ინფორმაციას ცვლიან ინტერპოლის არხების საშუალებით ნებაყოფლობით საფუძველზე", ხოლო შსს-ს მიერ მითითებული ინტერპოლის მონაცემთა დამუშავების მე-5 მუხლის მე-3 ნაწილი საერთაშორისო საპოლიციო თანამშრომლობის მიზნებისთვის ხელთ არსებული ინფორმაციის სავალდებულო გაცვლას არ ითვალისწინებს" - აცხადებს გირჩი.

დღეს შინაგან საქმეთა სამინისტრომ On.ge-ს განუცხადა, რომ საქართველოსა და რუსეთის ფედერაციის შინაგან საქმეთა სამინისტროებს შორის პირდაპირი საპოლიციო თანამშრომლობა არ ხორციელდება, თუმცა, მათი თქმით, ინტერპოლის წევრი ქვეყნები ვალდებულნი არიან, ერთმანეთთან საერთაშორისო საპოლიციო თანამშრომლობის მიზნებისათვის გაცვალონ მათ ხელთ არსებული ინფორმაცია.

"ყოველივე აღნიშნულიდან გამომდინარე, ინფორმაციის გაცვლა ინტერპოლის 190 წევრ ქვეყანაში ძებნილ პიროვნებაზე წარმოადგენს ვალდებულებას" - განგვიცხადეს შსს-ში.

გირჩი ხელისუფლებას მიმართავს, გაატაროს ყველა ზომები, რომ საქართველოს მოქალაქე და ჯარისკაცი გია ცერცვაძე არ გადაეცეს რუსეთს. პარტიაში აცხადებენ, რომ ამ შემთხვევაში ცერცვაძის სიცოცხლესა და ჯანმრთელობას შესაძლოა საფრთხე დაემუქროს.

გირჩი ხელისუფლებას ასევე მოუწოდებს, რომ ყველა მისი ნაბიჯი იყოს საჯარო, რათა საზოგადოებას მიეცეს ხელისუფლების ქმედებებზე თვალყურის დევნების შესაძლებლობა.

გთავაზობთ პარტიის განცხადებას სრულად.

მიმდინარე წლის 22 იანვარს რუსთავი ორის ეთერში გასულ სიუჟეტში "განწირული ჯარისკაცი" საუბარია საქართველოს მოქალაქე გია ცერცვაძეზე, რომელიც აფხაზეთისა და აგვისტოს ომის მონაწილეა და რომელიც უკანასკნელ ხანებში მოხალისედ იბრძოდა უკრაინაში რუსული მხარის წინააღმდეგ.

სიუჟეტის მიხედვით ირკვევა, რომ ა.წ. 15 იანვარს რუსეთის მხარის მოთხოვნით გია ცერცვაძე უკრაინულმა მხარემ დააკავა ინტერპოლის ინფორმაციაზე დაყრდნობით.

უკრაინულ სასამართლოს, საქმის მასალებთან ერთად, აღმოაჩნდა გია ცერცვაძის შესახებ არსებული ყველა პასპორტის მონაცემი და სხვა დოკუმენტაცია, რომელიც მხოლოდ ქართულ მხარეს შეიძლება ჰქონოდა.

რუსთავი 2-ის კითხვაზე, როგორ მოხვდა ცერცვაძის შესახებ ინფორმაცია რუსეთის სამართალდამცველების ხელში, საქართველოს შინაგან საქმეთა სამინისტროს წერილობით პასუხში წერია, რომ "ინტერპოლის მონაცემთა გაცვლის პროცედურებისა და წესების" თანახმად, სახელმწიფო ვალდებულია, დაინტერესებულ მხარეს მიაწოდოს ინფორმაცია ძებნილი პიროვნების შესახებ.

ინტერპოლის ვებ-გვერდზე მოძიებული ინფორმაციის თანახმად ირკვევა, რომ "ინტერპოლის წევრი სახელმწიფოები ინფორმაციას ცვლიან ინტერპოლის არხების საშუალებით ნებაყოფლობით საფუძველზე", ხოლო შსს-ს მიერ მითითებული ინტერპოლის მონაცემთა დამუშავების მე-5 მუხლის მე-3 ნაწილი საერთაშორისო საპოლიციო თანამშრომლობის მიზნებისთვის ხელთ არსებული ინფორმაციის სავალდებულო გაცვლას არ ითვალისწინებს.

მოვუწოდებთ ხელისუფლებას, აღნიშნულ საკითხზე მაღალი საზოგადოებრივი ინტერესიდან გამომდინარე, საქმის სპეციფიკის გათვალისწინებით:

  1. მოახდინოს მოსახლეობის ინფორმირება, თუ როდის გადასცა ინფორმაცია რუსულ მხარეს, რუსეთში საქმის აღძვრის მომენტისთვის თუ ინტერპოლის მიერ ძებნის გამოცხადების შემდეგ? თუ ოფიცერი გია ცერცვაძე უკვე იძებნებოდა ინტერპოლის მიერ იმ მომენტისთვის, როდესაც მან გადაკვეთა საქართველოს საზღვარი, მესაზღვრეებს იგი არ უნდა გაეტარებინათ.
  2. ასევე, იმ ფაქტორის გათვალისწინებით, რომ საუბარია აფხაზეთისა და 2008 წლის ომების მონაწილე სამხედრო პირზე, რომელიც მიმდინარე მომენტისთვის დახმარებას უწევდა უკრაინულ შეიარაღებულ ძალებს რუსეთთან ბრძოლაში, ხელისუფლებამ განმარტოს რატომ არ გამოიყენეს ქართულმა სახელმწიფო სტრუქტურებმა ინტერპოლის წესების შესაბამისად ინფორმაციის არგადაცემის უფლება?
  3. მოვითხოვთ, ხელისუფლებამ გადადგას ყველა საჭირო ნაბიჯი, რათა არ მოხდეს საქართველოს მოქალაქის გადაცემა რუსეთისთვის, სადაც მის სიცოცხლესა და ჯანმრთელობას შესაძლოა საფრთხე დაემუქროს. ყველა ეს ნაბიჯი უნდა იყოს საჯარო, რათა საზოგადოებას მიეცეს ხელისუფლების ქმედებებზე თვალყურის დევნების შესაძლებლობა.

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში დააპატიმრეს.

რუსთავი 2-ის ინფორმაციით, რუსეთიდან უკრაინაში გადაგზავნილ საქმის მასალებში წერია, რომ ქართველ ჯარისკაცს 2003 წელს რუსეთში ჩადენილი მკვლელობისთვის ეძებენ.

დაკავებულის ოჯახის წევრები ტელეკომპანიასთან საუბრისას აცხადებენ, რომ ქართველი სამხედროს პერსონალური ინფორმაცია რუსეთს შესაძლოა საქართველოს ხელისუფლების წარმომადგენლებმა გადასცეს, რადგან ჯარისკაცზე ინფორმაცია მხოლოდ საქართველოს მთავრობის ხელში იყო.

აღნიშნულ თემაზე რუსთავი 2-თან კომენტირებისას, ქართული ოცნების ერთ-ერთი ლიდერი ზაქარია ქუცნაშვილი აცხადებს, რომ ქართველ სამხედროსთვის ამა თუ იმ ომში ბრძოლა ინდულგენციას არ წარმოადგენს და "ასეთი ტიპის" დანაშაულში ეჭვმიტანილი პირის მიმართ მართლმსაჯულება მკაცრი უნდა იყოს, იმის მიუხედავად, რომ საქართველოს რუსეთთან დიპლომატიური ურთიერთობა გაწყვეტილი აქვს.