ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში დააპატიმრეს.

რუსთავი 2-ის ინფორმაციით, რუსეთიდან უკრაინაში გადაგზავნილ საქმის მასალებში წერია, რომ ქართველ ჯარისკაცს 2003 წელს რუსეთში ჩადენილი მკვლელობისთვის ეძებენ.

დაკავებულის ოჯახის წევრები ტელეკომპანიასთან საუბრისას აცხადებენ, რომ ქართველი სამხედროს პერსონალური ინფორმაცია რუსეთს შესაძლოა საქართველოს ხელისუფლების წარმომადგენლებმა გადასცეს, რადგან ჯარისკაცზე ინფორმაცია მხოლოდ საქართველოს მთავრობის ხელში იყო.

აღნიშნულ თემაზე რუსთავი 2-თან კომენტირებისას, ქართული ოცნების ერთ-ერთი ლიდერი ზაქარია ქუცნაშვილი აცხადებს, რომ ქართველ სამხედროსთვის ამა თუ იმ ომში ბრძოლა ინდულგენციას არ წარმოადგენს და "ასეთი ტიპის" დანაშაულში ეჭვმიტანილი პირის მიმართ მართლმსაჯულება მკაცრი უნდა იყოს, იმის მიუხედავად, რომ საქართველოს რუსეთთან დიპლომატიური ურთიერთობა გაწყვეტილი აქვს:

"მიუხედავად ამ ურთიერთობისა, რომ ჩვენ დიპლომატიური ურთიერთობა გაწყვეტილი გვაქვს [რუსეთთან], მე ვფიქრობ, რომ ასეთ ტიპის დანაშაულში ეჭვმიტანილი ხალხის მიმართ, მართლმსაჯულება უნდა იყოს ძალიან მკაცრი. არ ვიცი, გია ცერცვაძეს რაში დებენ ბრალს ეს არ ვიცი. არ შეიძლება იყოს აფხაზეთში ბრძოლა ან უკრაინაში ბრძოლა, ინდულგენცია. ეს არ არის რაღაცისაგან პასუხისმგებლობის თავის არიდების საშუალება. ოთხოზორიას მკვლელიც იბრძოდა აფხაზებისთვის აფხაზებში და ამ საბაბით არ უნდა გადმოგვცენ მკვლელობის ჩადენაში ეჭვმიტანილი პირი?"

გია ცერცვაძის ოჯახის წევრები პოსკრიპტუმთან საუბრისას აცხადებენ, რომ რუსეთმა აგვისტოს ომში მონაწილე პირების მიმართ "ომი დაიწყო".