სომხეთის პრეზიდენტის, არმენ სარქისიანის განცხადებით, ქვეყნის კრიზისიდან გამოსაყვანად პრემიერმინისტრი უნდა გადადგეს და ვადამდელი საპარლამენტო არჩევნები უნდა დაინიშნოს. 16 ნოემბერს საღამოს მიმართვის დროს მან განაცხადა, რომ არაერთ პოლიტიკურ ძალას ესაუბრა.

"შეხვედრების მონაწილეთა უმრავლესობა თანხმდება ერთ საკითხზე: პრემიერმინისტრის გადადგომა ან მისთვის საქმიანობის შეწყვეტა კონსტიტუციის შესაბამისად და ვადამდელი საპარლამენტო არჩევნები", — განაცხადა პრეზიდენტმა.

არჩევნებისთვის მომზადების პერიოდში, სარქისიანი ამბობს, რომ ძალაუფლება უნდა გადაეცეს ეროვნული თანხმობის მაღალკვალიფიციურ მთავრობას, თუმცა ვინ უნდა შევიდნენ ამ მთავრობაში, მან არ დაასახელა.

ერთ კვირაზე მეტია, რაც სომხეთში მთიანი ყარაბაღის სამშვიდობო შეთანხმების გამო აქციები არ წყდება. მოსახლეობის ნაწილი პრემიერმინისტრ ნიკოლ ფაშინიანს ღალატში ადანაშაულებს, ოპოზიცია კი მის გადადგომას მოითხოვს.

9 ნოემბერს გვიან ღამით რუსეთის შუამავლობით სომხეთსა და აზერბაიჯანს სამშვიდობო შეთანხმება გაფორმდა. დოკუმენტს ხელი რუსეთის პრეზიდენტმა, სომხეთის პრემიერმინისტრმა და აზერბაიჯანის პრეზიდენტებმა მოაწერეს.

სამმხრივი შეთანხმების მიხედვით, აღდამის რეგიონი აზერბაიჯანს 20 ნოემბრამდე უნდა დაუბრუნდეს. 15 ნოემბრამდე აზერბაიჯანს გადაეცემა ლაჩინის რეგიონი. გარდა ამისა, მთიან ყარაბაღში ბრუნდებიან დევნილები. ლაჩინის რეგიონში 5 კილომეტრი სიგანის დერეფანი შეიქმნება. დერეფანი მთიან ყარაბაღსა და სომხეთს დააკავშირებს ერთმანეთთან, არ შეეხება ქალაქ შუშას (შუშის) და რუსეთის სამშვიდობოების კონტროლის ქვეშ იქნება. ლაჩინის დერეფანში 1 960 რუსი სამხედრო, 90 ჯავშანტრანსპორტიორი და 380 ერთეული საავტომობილო და სპეციალური ტექნიკა განლაგდება.

რუსეთის სამშვიდობო მისია ლაჩინის რეგიონში ხუთი წლით დარჩება და მათი იქ ყოფნის ვადა ავტომატურად გაგრძელდება, თუ ვადის ამოწურვამდე ექვსი თვით ადრე რომელიმე მხარე აღნიშნული რეჟიმის გაუქმებას არ მოინდომებს.

მთიან ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. ერევნისგან განსხვავებით, ბაქოში შეთანხმებას სიხარულით შეხვდნენ.

ამავე თემაზე: