დავით ნარმანია 2016 წლის ივნისში აცხადებდა, რომ თბილისის მერია ტროტუარზე პარკირებას, ალტერნატივის გარეშე, იმავე წლის სექტემბრიდან აკრძალავდა. პირობა ჯერ არ შესრულებულა, თუმცა როგორც მერიაში გვითხრეს, ამ საკითხზე მუშაობა კიდევ მიმდინარეობს:

"ქვეითთა უსაფრთხოების უზრუნველსაყოფად, მიმდინარეობს მუშაობა ტროტუარებზე ავტომანქანების პარკირების შეზღუდვის სქემაზე".

როგორც უწყებაში On.ge-ს უთხრეს, 2014 წლიდან დღემდე ტროტუარებზე პარკირების 2200-მდე ადგილი 1 316-მდე შემცირდა, ხოლო ფეხბურთის ფედერაციის მიმდებარედ, ჭავჭავაძის 39-სა და 41-ში ტროტუარებზე გაკეთდა შეჭრები - ე.წ. ჯიბეები.

პარკირების პრობლემის მოგვარების მიზნით, თბილისის მერია ქალაქის მასშტაბით მინიმუმ 10 მიწისზედა ან/და მიწისქვეშა ავტოსადგომის მოწყობას გეგმავს, რისთვისაც საკონსულტაციო მომსახურებაზე დავალება უკვე გაცემულია.

მერიაში განგვიცხადეს, რომ შერჩეულია კონსულტანტი კომპანია PWC (პრაისვოთერ პაურსკუპერს ცენტრალური აზია და კავკასია ბი.ვი-ს ფილიალი საქართველოში), რომელიც უზრუნველყოფს სათანადო კვლევის ჩატარებას.

"კვლევის გეოგრაფიულ არეალს წარმოადგენს ვაკის, საბურთალოს, მთაწმინდის, დიდუბის და ჩუღურეთის რაიონების ცენტრალური ქუჩები, სადაც უნდა შეირჩეს არანაკლებ 10 ერთეული მრავალდონიანი ავტოსადგომის ადგილი, ტექნიკური დავალებით გათვალისწინებული პირობების შესაბამისად" - აცხადებენ მერიაში.

ტექნიკურ-ეკონომიკური დასაბუთების ფარგლებში კომპანია PWC ვალდებულია განახორციელოს ბაზრის კვლევა. ბაზრის კვლევის მიზანია დარგში არსებული მდგომარეობის, ტენდენციების აღწერა, ანალიზი და საჭიროებების დადგენა მრავალდონიანი ავტოსადგომების საუკეთესო ლოკაციების, ტექნიკური პარამეტრების და პროექტის კომერციული სტრუქტურის განსაზღვრის მიზნით. ლოკაციების განსაზღვრისას კონსულტანტმა უნდა ჩაატაროს გეოლოგიური კვლევა და ადგილმდებარეობის შესწავლა კომუნიკაციების დადგენის თვალსაზრისით.

2016 წლის 2 ნოემბერს, ჭავჭავაძის გამზირის ტროტუარზე ქალს ავტომანქანა დაეჯახა. თვითმხილველთა თქმით, მძღოლი უკანა სვლით მოძრაობდა და ქალი ვერ შენიშნა.

აღსანიშნავია, რომ ჭავჭავაძის გამზირის ტროტუარებს მძღოლები ავტომობილის პარკინგისა და გადაადგილებისთვის ამ დრომდე თავისუფლად იყენებენ