მეორე ტურისთვის როდესაც ქართული ოცნება ადმინისტრაციული რესურსის მიყვანით იქნება დაკავებული, ჩვენ გამოვიდეთ და მშვიდობიანი ჯაჭვში ჩავდგეთ. ამის შესახებ დღეს აქციაზე ნაციონალური მოძრაობის ერთ-ერთმა ლიდერმა ნიკა მელიამ განაცხადა.

"გიფრთხილდებით, მინდა რომ შაბათს ძალიან ბევრი ვიყოთ, ლაღები და ჯანმრთელები, სწორად გამიგეთ არ გეწყინოთ. მეორე ტური სავარაუდოდ იქნება 21 ნოემბერს და მაშინ, როდესაც მთელი ქართული ოცნება ადმინისტრაციული რესურსის მიყვანით დაკავდება, ჩვენ გამოვიდეთ მშვიდობიანად და რუსთაველის გამზირიდან ვაკისპარკამდე ჯაჭვში ჩავდგეთ", — განაცხადა ნიკა მელიამ.

მეორე დღეა ოპოზიციური პარტიების მიერ ორგანიზებული საპროტესტო აქციები მიმდინარეობს. რუსთაველზე შეკრებილი ხალხი საპარლამენტო არჩევნების შედეგებს არ აღიარებს და რიგაგრეშე არჩევნებს ითხოვს.

ამასთან, დღეს ამოქმედდა საკოორდინაციო საბჭოს მიერ დაწესებული ახალი შეზღუდვა, რომლის თანახმადაც, საღამოს 22:00 საათიდან დილის 05:00 საათამდე გადაადგილება იკრძალება და ჯარიმით ისჯება.