ალექსანდრე ხოჯევანიშვილმა საკოორდინაციო საბჭოზე განაცხადა, რომ მოქალაქეებს საშუალება ექნებათ, 10 საათის შემდეგ გადაუდებელი შემთხვევების დროს ერთჯერადი საშვით ისარგებლონ.

"ჩვენს მოქალაქეებს გადაუდებელი შემთხვევის დროს, საშუალება ექნებათ ღამის 10 საათის შემდეგ გადაადგილებისთვის ერთჯერადი საშვი გამოიყენონ. ამისთვის უნდა დარეკონ 144 "1", რომელიც ამოქმედდება დღეს 18:00-დან", — განაცხადა ალექსანდრე ხოჯევანიშვილმა.

საკოორდინაციო საბჭოს გადაწყვეტილებით, დღეიდან, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდება. შეზღუდვა გავრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.

ვიცე პრემიერის მაია ცქიტიშვილის თქმით, ეს არ არის კომენდანტის საათი. რაც შეეხება სანქციას, მისი თქმით, ჯარიმა 2 000 ლარი იქნება, თუმცა მოგვანებით ინფორმაცია დეტალურად გავრცელდება.

დღეიდან ასევე ფუნქციონირებას წყვეტს ყველა კერძო და მუნიციპალური საბავშვო ბაღი.

საქართველოში ბოლო 24 საათის განმავლობაში გამოვლენილია ინფიცირების 2 927 ახალი შემთხვევა.

პირველი ინფიცირების შემთხვევიდან დღემდე ქვეყანაში გამოვლენილი კოვიდ-19-ის დადასტურებული შემთხვევების საერთო რაოდენობა 60 680-ს შეადგენს.