ნაციონალური მოძრაობის ლიდერის, ხატია დეკანოიძის განცხადებით, მთავრობის დაწესებული შეზღუდვები ხელს ვერ შეუშლის ოპოზიციის გეგმებს. მისი თქმით, ეს შეზღუდვები დაწესებულია იმისთვის, რომ ხელი შეუშალონ გამოხატვის თავისუფლებას.

"არ შეუძლია ნამდვილად არავითარ სამომავლო გეგმებს. პირდაპირ მინდა გითხრათ, რომ ეს შეზღუდვები დაწესებულია იმისთვის, რომ ადამიანებს ხელი შეუშალონ პროტესტის გამოხატვაში. ახლა ფიქრობენ, რომ ჩაკეტავენ ქალაქებს... ამდენი ხნის განმავლობაში არ გადადუგამთ ეს ნაბიჯი, ახლა ჩაკეტეს. მე არ ვფიქრობ, რომ ამ ხელისუფლებას საერთოდ რამე უშველის, ზოგადად, რაც არ უნდა გააკეთონ, რა გზასაც არ უნდა მიმართონ, ახალი არჩევნები დაინიშნება თავისუფალი საარჩევნო ადმინისტრირებით", — განაცხადა მან.

არჩევნების შემდეგ, როცა ოპოზიციამ აქციები დაანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები. ხვალ, 8 ნოემბერს თბილისში, პარლამენტის წინ ოპოზიციას მასშტაბური აქცია აქვს დაგეგმილი.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდება. შეზღუდვა გავრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.

ინფრასტრუქტურის მინისტრ მაია ცქიტიშვილის განცხადებით, შეზღუდვა არ გავრცელდება საერთაშორისო საავტომობილო გადაზიდვებზე და საოპერაციო შტაბთან შეთანხმებით, იმ პირებსა და საავტომობილო საშუალებებზე, რომლებიც სტრატეგიული ობიექტების ფუნქციონირებისთვის გადაადგილდებიან.

ცქიტიშვილმა ასევე აღნიშნა, რომ ეს არ არის კომენდანტის საათი. რაც შეეხება სანქციას, მისი თქმით, ჯარიმა 2 000 ლარი იქნება, თუმცა მოგვანებით ინფორმაცია დეტალურად გავრცელდება.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: