რამდენიმე წუთის წინ შინაგან საქმეთა სამინისტროს თანამშრომლებმა გირჩის ოფისიდან დალუქული მცენარეები გამოიტანეს. სამართალდამცავებმა ოფისი ტაშის ფონზე დატოვეს. როგორც პარტიაში ამბობენ, მცენარეები 31 დეკემბერს დათესილი მარიხუანაა.

გირჩის ოფისში შსს-ს წარმომადგენლები დაახლოებით 6 საათის წინ მივიდნენ. მცენარეების დალუქვის დაწყებამდე პარტიის ოფისი ყველა ჟურნალისტს დაატოვებინეს.

11 დღე გავიდა მას შემდეგ, რაც პოლიტიკურმა პარტიამ, გირჩი, საკუთარ ოფისში მარიხუანის დათესვის შესახებ განცხადება გააკეთა. მცენარის დათესვა საქართველოს რამდენიმე ტელევიზიის პირდაპირ ეთერში გადაიცა. 3 დღის წინ კი პარტიის ფეისბუკის ოფიციალურ გვერდზე ახალამოსული მცენარეების ფოტოებიც გამოქვეყნდა.

შსს-მ გამოძიება 31 დეკემბერსვე დაიწყო, თუმცა ამ დრომდე პარტიის ოფისში სამართალდამცავები არ იყვნენ მისული და არც პარტიის წევრები დაუკითხავთ.