10 დღე გავიდა მას შემდეგ, რაც პოლიტიკურმა პარტიამ, გირჩი, საკუთარ ოფისში მარიხუანის დათესვის შესახებ განცხადება გააკეთა. მცენარის დათესვა საქართველოს რამდენიმე ტელევიზიის პირდაპირ ეთერში გადაიცა. 2 დღის წინ კი პარტიის ფეისბუკის ოფიციალურ გვერდზე ახალამოსული მცენარეების ფოტოებიც გამოქვეყნდა.

იმ მცენარის ფოტოების გამოქვეყნების შემდეგ, რომელიც, გირჩის მტკიცებით, მარიხუანაა On.ge დაინტერესდა, რა ეტაპზეა გამოძიება.

გირჩში აცხადებენ, რომ 31 დეკემბრიდან 10 იანვრამდე შინაგან საქმეთა სამინისტროს წარმომადგენლები მათ ოფისში არ მისულან და არც რაიმე შეტყობინება გაუგზავნიათ.

„არავინ არ ყოფილა მოსული, მიუხედავად იმისა, რომ მარიხუანა ისე გაიზარდა, ლამის მოწიონ“, - გვითხრა პარტიის პრესსამსახურის თანამშრომელმა, მარტა ბარამიძემ.

On.ge მეორე დღეა შინაგან საქმეთა სამინისტროს პრესსამსახურიდან ელოდება პასუხს - რა ღონისძიებები გაატარა შსს-მ 31 დეკემბრის შემდეგ გირჩის ოფისში მარიხუანის შესაძლო დათესვასთან დაკავშირებით და დაიკითხა თუ არა ვინმე.

საქართველოს შინაგან საქმეთა სამინისტრომ მარიხუანის შესაძლო დათესვასთან დაკავშირებით გამოძიება 31 დეკემბერსვე სისხლის სამართლის კოდექსის 265-ე მუხლით დაიწყო.

ნარკოტიკული საშუალების შემცველი მცენარის უკანონო დათესვა, მოყვანა ან კულტივირება ისჯება ჯარიმით, ან თავისუფლების აღკვეთით ვადით ორიდან ხუთ წლამდე.

იგივე ქმედება, ჩადენილი დიდი ოდენობით; წინასწარი შეთანხმებით ჯგუფის მიერ; სამსახურებრივი მდგომარეობის გამოყენებით; არაერთგზის ან იმის მიერ, ვისაც წინათ ჩადენილი „ნარკოტიკული დანაშაული“ ისჯება თავისუფლების აღკვეთით ვადით ოთხიდან შვიდ წლამდე.

ნარკოტიკული საშუალების შემცველი მცენარის უკანონო დათესვა, მოყვანა ან კულტივირება განსაკუთრებით დიდი ოდენობით, ან ორგანიზებული ჯგუფის მიერ, ისჯება თავისუფლების აღკვეთით ვადით ექვსიდან თორმეტ წლამდე.

ამ ქმედებისათვის იურიდიული პირი ისჯება ჯარიმით, საქმიანობის უფლების ჩამორთმევით ან ლიკვიდაციით და ჯარიმით.