საგარეო საქმეთა მინისტროს მოადგილისა და სახელმწიფო კომისიის თავმჯდომარის, ლაშა დარსალიას განცხადებით, სხვადასხვა დროს წარსულში გაკეთებული გამონათქვამები ხელისუფლების წარმომადგენლებისგან არასათანადოდ ამყარებს ან აზიანებს საქართველოს პოზიციებს. ამის შესახებ მან სპეციალურად გამართულ ბრიფინგზე ისაუბრა.

"გარკვეული გამონათქვამები ხელისუფლების წარმომადგენლებისგან სხვადასხვა დროს და გარკვეული ნაბიჯები არასათანადოდ ამყარებს ჩვენს პოზიციებს და, პირიქით, შეიძლება, ჩვენს საზიანოდაც მოქმედებდეს. შესაბამისად, შემდეგში საჭირო იქნება აზერბაიჯანელ კოლეგებთან ურთიერთობაში გარკვეული მიდგომები, ქართულ მხარეს დასჭირდება მოლაპარაკებების პროცესში მტკიცებულებების გამყარება, რომელიც, გარკვეულწილად, წარსული უმოქმედობით ან არასწორი ქმედებებით იყო განპირობებული", — განაცახადა დარსალიამ.

ჟურნალისტების კითხვაზე, დაძაბა თუ არა 2019 წელს პრეზიდენტ სალომე ზურაბიშვილის საზღვარზე ჩასვლამ და განცხადებებმა საზღვრის დადგენასთან დაკავშირებით სიტუაცია, დარსალიამ უპასუხა, რომ ეს საკითხი ვერ დაძაბავს ქართულ-აზერბაიჯანულ ურთიერთობებს. ის მიიჩნევს, რომ ქვეყნებს შორის ურთიერთობებში საზღვრის არ დადგენა უფრო დიდი პრობლემაა.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასამთავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: