ქართული ოცნების ერთ-ერთი ლიდერი, მამუკა მდინარაძე აზერბაიჯანთან საზღვრის დემარკაციის საქმეს 2007 წლის აპრილში საქართველოს სისხლის სამართლის კოდექსიდან 307-ე მუხლის ამოღებას უკავშირებს. კერძოდ, დეპუტატი აცხადებს, რომ კომისიის დონეზე წარმოებული ერთ-ერთი შეთანხმების შემდეგ, საქართველოს პარლამენტმა სახელმწიფო ღალატის მუხლი გააუქმა.

"ეს შეთანხმებები როდესაც დგებოდა, ერთ-ერთი მორიგი შეთანხმების დროს, როდესაც 300-ზე მეტი ჰექტარი საქართველოს საუარესოდ შეთანხმდა, აქედან დაახლოებით 1 თვეში და დავარქვათ თუნდაც დამთხვევა, თუ ვინმე ამას დაიჯერებს, რომ დამთხვევაა — საქართველოს პარლამენტმა 2007 წლის მარტსა თუ აპრილში გააუქმა სახელმწიფო ღალატის მუხლი", — განაცხადა მდინარაძემ.

მამუკა მდინარაძე აღნიშნულ თემაზე ორ ვერსიას განიხილავს. პირველი ვერსიის მიხედვით, ამ ორი ამბის თანმიმდევრულობა უბრალოდ დამთხვევაა, ხოლო მეორე ვერსიის თანახმად, ეს შეგნებული მოქმედება იყო.

ამასთანავე, მდინარაძე ამბობს, რომ თვითონ მეორე ვერსიის უფრო სჯერა, ვინაიდან იმ პერიოდში "ქვემოდან ზემოთ" გადაწყვეტილება ვერ წამოვიდოდა.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისის წევრები დააკავეს. 9 ოქტომბერს კი ილიჩვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასათავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: