ქართული ოცნების აღმასრულებელი მდივანი, ირაკლი კობახიძე დავით გარეჯის საქმეზე დაკავეულ კომისიის წევრებზე ოპოზიციის გუშინდელი რეაქციას ხელისუფლებაზე ორგანიზებულ თავდასხმაუწოდებს.

"დღეს, როდესაც რეალურად გაჩნდა შესაძლებლობა, დელიმიტაციის ჩიხში შესული პროცესი სამართლიანად, ქართული და აზერბაიჯანული მხარეების მიერ პროცესის დასაწყისშივე შეთანხმებული ალგორითმით და ჩვენი ქვეყნის ინტერესების სასარგებლოდ გადაწყდეს, რადიკალური ოპოზიცია ორგანიზებულ თავდასხმას ახორციელებს ხელისუფლებაზე და ცდილობს დაამტკიცოს, რომ ახლად აღმოჩენილი უმნიშვნელოვანესი დოკუმენტები, მათ შორის აღმოჩენილი რუკა, რომელიც საკითხის სათანადოდ გადაწყვეტის ახალ შესაძლებლობას ქმნის, გამონაგონი და ტყუილია", — განაცხადა კობახიძემ.

მისი თქმით, ხელისუფლების წინააღმდეგ "ორკესტრირებული შეტევისას" განსაკუთრებით წინა ხელისუფლების საგარეო ბლოკის წარმომადგენლები აქტიურობდნენ.

"ჩვენ გუშინ განვაცხადეთ, რომ ამ თემით პოლიტიკური სპეკულაციის შემთხვევაში, ცალსახად მოხდებოდა პოლიტიკური ლუსტრაცია, რაც უკვე დადასტურდა. ბუნებრივია, ნებისმიერი ხელისუფლება ცდილობს, თავისი ქვეყნის სასარგებლოდ გადაწყვიტოს სახელმწიფო საზღვრის საკითხი, გარდა იმ ხელისუფლებისა, რომელსაც არ უყვარს საკუთარი ხალხი, ისტორია და სამშობლო, როგორიც იყო „ნაციონალური მოძრაობის“ ხელისუფლება", — თქვა ქართული ოცნების აღმასრულებელმა მდივანმა.

კობახიძის თქმით, აზერბაიჯანი საქართველოს სტრატეგიული პარტნიორი და მეგობარი ქვეყანაა, რომლის წარმომადგენლების მხრიდან შესაბამისი განცხადებები გაკეთდა. მისივე თმით, საზღვართან დაკავშირებული საბოლოო გადაწყვეტილება ორივე მხარის ინტერესების, კეთილმეზობლური ურთიერთობისა და საქმიანი თანამშრომლობის გათვალისწინებით იქნება მიღებული.

გუშინ, 7 სექტემბერს აზერბაიჯანთან საზღვრის შეთანხმების საქმეზე სახელმწიფო კომისიის ყოფილი წევრები, ივერი მელაშვილი და ნატალია ილიჩოვა დააკავეს. აღნიშნულს ოპოზიციის მხრიდან მწვავე რეაქცია მოჰყვა. მათ პროკურატურასთან აქცია გამართეს.