საქართველოს საგარეო საქმეთა სამინისტროს განცხადებით, სირიაში ოკუპირებული აფხაზეთის ე.წ. საელჩოს გახსნა იმ სრულიად უკანონო გადაწყვეტილების გაგრძელებას წარმოადგენს, რომელიც ასადის რეჟიმმა რუსეთის ზეწოლის შედეგად 2018 წელს მიიღო. სირიამ სწორედ ამ დროს აიღარა ოკუპირებული რეგიონი დამოუკიდებელ სახელმწიფოდ.

"საერთაშორისო თანამეგობრობამ მკაცრად დაგმო ასადის რეჟიმის უკანონო გადაწყვეტილება სოხუმსა და ცხინვალში რუსეთის საოკუპაციო რეჟიმებთან ე.წ. დიპლომატიური ურთიერთობების დამყარების თაობაზე. არალეგიტიმურ გადაწყვეტილებას მკაფიოდ გაემიჯნენ სირიის ოპოზიციური ძალებიც, რომელთაც მხარი დაუჭირეს საქართველოს ტერიტორიულ მთლიანობას", — ვკითხულობთ განცხადებაში.

5 ოქტომბერს ოკუპირებული აფხაზეთის დე ფაქტო საგარეო საქმეთა სამინისტრომ განაცხადა, რომ სირიის დედაქალაქ დამასკოში აფხაზეთის ე.წ. საელჩო 6 ოქტომბერს გაიხსნებოდა.

რუსეთის მოკავშირე სირიამ საქართველოს ოკუპირებული რეგიონების დამოუკიდებლობა 2018 წელს აღიარა, რომლის შემდეგ თბილისმა დამასკოსთან დიპლომატიური ურთიერთობები გაწყვიტა.