ჰარი პოტერზე შექმნილ საქვეყნოდ ცნობილ ფილმებს წინ მომზადების ხანგრძლივი პერიოდი უძღვოდა. ეკრანიზაციაზე მომუშავე ჯგუფმა საგულდაგულოდ აარჩია ყველა ის მსახიობი, რომელთა გარეშეც ახლა ჯადოსნური სამყარო ვერც კი წარმოგვიდგენია. რობინ უილიამსი ერთ-ერთი პირველი იყო, ვინც ღიად დააფიქსირა გახმაურებულ პროექტში მონაწილეობის სურვილი. მსახიობს სურდა, ბედი ჰაგრიდის როლზე ეცადა, თუმცა მას პოტერიადაში მონაწილეობაზე უარი განუცხადეს.

სულ ცოტა ხნის წინ კასტინგის მენეჯერმა, ჯანეტ ჰირშენსონმა განმარტა, რა გახდა უარის თქმის მიზეზი და რის გამო "დაიწუნეს" რობინი როლზე.

"მას [რობინს] მთელი გულით სურდა ფილმში მონაწილეობა, თუმცა სამწუხაროდ ეს შეუძლებელი აღმოჩნდა. წიგნის ავტორს, ჯოან როულინგს მიაჩნდა, რომ ჰარი პოტერის ეკრანიზაციებში მხოლოდ ბრიტანელ მსახიობებს უნდა მიეღოთ მონაწილეობა. უილიამსს უარი უთხრეს, რადგან ის უბრალოდ არ იყო ბრიტანელი",- ამბობს ჯანეტი.

დარწმუნებული ვარ, გაინტერესებთ კიდევ რა კრიტერიუმებით იხელმძღვანელეს რეჟისორმა და წიგნის ავტორმა მსახიობების შერჩევისას. სულ მალე სხვა "პოტერიადისთვის დაწუნებულ" ვარსკვლავებსაც შემოგთავაზებთ.