ქართული ოცნება მარნეულში მომხდარ დაპირისპირებაში ნაციონალურ მოძრაობას ადანაშაულებს.

"ნაციონალური მოძრაობის აქტივმა ძალადობა არ იკმარა და ამჯერად, საღამოს საათებში, ალკოჰოლური ზემოქმედების ქვეშ მყოფი მათი აქტივისტები “ქართული ოცნების” ოფისთან მივიდნენ და ჩვენს მხარდამჭერებზე როგორც სიტყვიერად, ისე ფიზიკურად ძალადობა დაიწყეს, რის შემდეგაც ვითარება გართულდა და კონფლიქტი ორმხრივ დაპირისპირებაში გადაიზარდა", — აცხადებენ პარტიაში.

მათი თქმით, სახელმწიფო დესტაბილიზაციისა და არეულობის მცდელობებს არ დაუშვებს და ყველა პირი, ვინც კანონის ფარგლებს გაცდება, დაისჯება.

დღეს მარნეულში მთავარი არხისა და საზოგადოებრივი მაუწყებლის ჟურნალისტებსა და ოპერატორებს ფიზიკურად გაუსწორდნენ. მომხდარზე შინაგან საქმეთა სამინისტრომ თანამშრომლებისთვის პროფესიული საქმიანობის ხელისშეშლის ფაქტებზე გამოძიება დაიწყო.