ფრაქცია ქართული ოცნების ყოფილი წევრი და პარლამენტის დამოუკიდებელი დეპუტატი დიმიტრი ცქიტიშვილი ამბობს, რომ, სავარაუდოდ, მეათე მოწვევის პარლამენტში არ იქნება. როგორც მან On.ge-ს უთხრა, ამ ეტაპზე ვერ ხედავს პარტიას, რომელშიც გაწევრიანდებოდა.

"რაღაც განსაკუთრებული თუ არ მოხდა, არ ვაპირებ [კენჭისყრას] იმიტომ, რომ არც ერთ პარტიასთან მე არ ვარ არც კავშირში და არც აფილირებული. დამოუკიდებელი დეპუტატი ვარ, შესაბამისად არც პარტიაში ვაპირებ გაწევრიანებას და მარტო პოლიტიკის კეთებისა დიდად არ მჯერა. პოლიტიკური გუნდს ჩემსას ვერ ვხედავ, რომელშიც შემიძლია გავწევრიანდე. ამიტომაც, სავარაუდოდ, 2020-2024 წლის პარლამენტში არ ვიქნები", — განაცხადა ცქიტიშვილმა.

დიმიტრი ცქიტიშვილმა და რამდენიმე დეპუტატმა ქართული ოცნება 2019 წლის შემოდგომაზე მას შემდეგ დატოვეს, რაც მმართველმა გუნდმა პროპორციული საარჩევნო სისტემის საკონსტიტუციო რეფორმა ჩააგდო.