პრემიერმინისტრმა, გიორგი გახარიამ გაეროს გენერალურ ასამბლეაზე ოკუპირებულ ტერიტორიაზე მცხოვრებ მოსახლეობას მიმართა და უნიკალური კულტურისა და თვითმყოფადობის შენარჩუნებისკენ მოუწოდა და განაცხადა, რომ საქართველოს აქვს მზაობა მათ ყველაფერი გაუზიარონ.

"საქართველოს მთავრობის სამშვიდობო ინიციატივა — ნაბიჯი უკეთესი მომავლისკენ არის მკაფიო განაცხადი, რომ საქართველო დაინტერესებულია აფხაზეთისა და ცხინვალის რეგიონებში მცხოვრებ ადამიანებთან დიალოგით. ჩვენ გვაღელვებს მათი ბედი და დაინტერესებული ვართ იქ სოციალურ-ეკონომიკური პირობების გაუმჯობესებით, ისევე, როგორც გამყოფი ხაზის ორივე მხარეს მცხოვრებ ადამიანებს შორის პირდაპირი კავშირების აღდგენით", — განაცხადა გახარიამ.

მისი თქმით, საქართველოს ხელისუფლება ძალისხმევას არ იშურებს, რომ დაკეტილი საოკუპაციო ხაზის პირობებშიც კი შეძლებისდაგვარად დაეხმაროს გაჭირვებაში მყოფ თანამემამულეებს.

"მივმართავ ჩვენს თანამემამულეებს საოკუპაციო ხაზების მეორე მხარეს — საქართველოს სურს და შეუძლია თქვენთვის ამ ყველაფრის გაზიარება. ჩვენ ერთად შეგვიძლია თქვენთვის და თქვენი შვილებისთვის შევქმნათ უკეთესი მომავალი", — განაცხადა პრემიერმინისტრმა.

გიორგი გახარიამ, ასევე, აღნიშნა, რომ გლობალური პანდემიის პირობებში საქართველოს და 54 ქვეყნის მიერ ინიცირებულ ჰუმანიტარული ხასიათის რეზოლუციის მხარდაჭრა მნიშვნელოვანია.

გაერთიანებული ერების ორგანიზაცია წელს 75 წლის გახდა და პირველად, მისი არსებობის განმავლობაში, გენერალური ასამბლეა იმართება დისტანციურად.

ამავე თემაზე: