სხვადასხვა დროს საქართველოში ამერიკის ელჩებმა, ჯონ ტეფტმა, უილიამ კორტნმა და კენეტ იალოვიცმა ამერიკულ ჟურნალ National Interest-ში სტატია გამოაქვეყნეს, სადაც, წერენ, რომ საარჩევნო კოდექსში შესული ცვლილებები პოზიტიურია, თუმცა, აღნიშნავენ, რომ ქართველი ხალხის ნების წარმოსაჩენად საარჩევნო კოდექსის უკეთ რეფორმა იყო შესაძლებელი. ყოფილი ელჩების განცხადებით, საქართველომ კორონავირუსის მართვას წარმატებით გაართვა თავი, მაგრამ ახლა 31 ოქტომბერს გასამართი საპარლამენტო არჩევნების თავისუფალ, გამჭვირვალე და სამართლიან გარემოში ჩასატარებლად გამოცდა უნდა ჩააბაროს.

სტატიაში აღნიშნულია, რომ 2018 წლის საპრეზიდენტო არჩევნებმა ძალადობების, დაშინებებისა და უცხოურ არასამთავრობო ორგანიზაციებისადმი მუქარის ფონზე ჩაიარა. ელჩები, აგრეთვე, 2019 წლის ივნისში თბილისში პარლამენტის შენობის წინ გამართული აქციის დროს ათასობით აქციის მონაწილის წინააღმდეგ, გაფრთხილების გარეშე, რეზინის ტყვიებისა და ცრემლსადენი გაზის გამოყენების ფაქტს იხსენებენ.

ყოფილი ელჩები საქართველოში მედიის თავისუფლების კუთხით არსებულ ვითარებაზე აცხადებენ, რომ მაუწყებლობის შესახებ კანონში ცვლილებების შეტანა რადიო და ტელემაუწყებლების კონტროლის საფრთხეს ქმნის.

ტვიფტი, იალოვიცი და კორტნი Covid-19-თან ბრძოლის საქმეში საქართველოს მთავრობას პოზიტიურად აფასებენ, თუმცა აღნიშნავენ, რომ ეკონომიკური კუთხით სიტუაცია ნაკლებად პოზიტიურია.

"როგორც ევროპის რეკონსტრუქციისა და განვითარების ბანკის პროგნოზი იყო, ქვეყნის მშპ 5,5%-ით შემცირდა. უმუშევრობა კვლავ ქვეყნის აქილევსის ქუსლად რჩება, ხოლო სიღარიბე კვლავ მაღალია, განსაკუთრებით სოფლებში", — აცხადებენ ისინი.

ყოფილი ელჩები მეტი უცხოური ინვესტიციების აუცილებლობას უსვამენ ხაზს. მათი განცხადებით, მიუხედავად იმისა, რომ ბიზნესის კეთების საქმეში მნიშვნელოვან გამჭვირვალობას მიაღწია, უცხოური ინვესტიციებისთვის არახელსაყრელ გარემოა და ამის მაგალითად ანაკლიის ღრმაწყლოვანი პორტის მშენებლობის ჩაგდება მოჰყავთ.