ტელეკომპანია რუსთავი 2 მისივე დაკვეთით Survation-ის მიერ ჩატარებულ კვლევას აქვეყნებს. კვლევის მიხედვით, კითხვაზე: "საპარლამენტო არჩევნები დღეს რომ ტარდებოდეს, რომელ პარტიას მისცემდით ხმას?", 55,7% ამბობს, რომ ქართულ ოცნებას, 16,2%-ის თქმით, ხმას ერთიან ნაციონალურ მოძრაობას მისცემდა. 6,0% სტრატეგია აღმაშენებელს ასახელებს, 5,6% კი ევროპულ საქართველოს. 4.5% ამბობს, რომ ხმას ლეიბორისტულ პარტიას მისცემს, 3,9% კი — პატრიოტთა ალიანსს.

ფოტო: რუსთავი 2

კვლევაში ასევე მოხვდნენ სხვა პარტიებიც. მაგალითად, ლელო აღნიშნული გამოკითხვებით 3,7%-ს აიღებდა, გირჩი 2,2%-ს, ერთიანი საქართველო 1%-ს, თავისუფალი დემოკრატები 0,5%-ს, ხოლო 0,7% აქვს სხვა პარტიას.

აღსანიშნავია, რომ არც ამჯერად, რუსთავი 2 არ ასახელებს გადაუწყვეტელი ამომრჩევლის პროცენტულ მაჩვენებელს. კვლევითი კომპანიის წარმომადგენელი ამას მეთოდოლოგიით ხსნის.

ფოტო: რუსთავი 2

კითხვაზე: "დღეს რომ ტარდებოდეს საპარლამენტო არჩევნები, რამდენად მიიღებდით მონაწილეობას", გამოკითხულთა 68,9% აცხადებს, რომ ამაში თითქმის დარწმუნებულია. 12,5%-ის თქმით, მონაწილეობას ალბათ მიიღებს, 12,2% კი აცხადებს, რომ ან მიიღებს მონაწილეობას, ან არა. გამოკითხულთა 6,2%-ის თქმით, არჩევნებში მონაწილეობას არ მიიღებს, 0,4%-მა კი ან არ იცის, ან უარს აცხადებს პასუხზე.

ფოტო: რუსთავი 2

რუსთავი ორის ინფორმაციით, იმ კითხვებზე პასუხის დასაზუსტებლად, თუ ვის მისცემდნენ გამოკითხულები ხმას, მათ ჩაეკითხნენ, რამდენად დარწმუნებულები არიან, რომ პოზიციას არ შეიცვლიან.

გამოკითხულთა პასუხები აღნიშნულ კითხვაზე ასე ნაწილდება: 64,9% სრულიად დარწმუნებულია, 26,5% მეტნაკლებად დარწმუნებულია, 4,1% მხოლოდ მცირედითაა დარწმუნებული, ხოლო 4% სრულიად არ არის დარწმუნებული.

კვლევა ასევე ითვალისწინებდა კითხვას, რამდენად ხშირად ადევნებდნენ რესპონდენტები თვალს მიმდინარე წინასაარჩევნო კამპანიას. გამოკითხულთა 12% ამბობს, რომ ძალიან აქტიურად ადევნებს თვალს, 23% — საკმაოდ აქტიურად, 42% — არც ისე აქტიურად, 23% — არ ადევნებს თვალს, ხოლო 1% აღნიშნულ კითხვაზე პასუხს არ სცემს.

ფოტო: რუსთავი 2

რუსთავი 2-ის ინფორმაციით, Survation-მა კვლევა 26 აგვისტოდან 2 სექტემბრის ჩათვლით ჩაატარა და პირისპირი ინტერვიუს მეთოდით, სახლში 1 205 ადამიანი გამოკითხა. რესპონდენტები შეირჩნენ ასაკის, სქესის, რეგიონის, ქალაქის/სოფლის ტიპის დასახლებების მიხედვით, დემოგრაფიულ მაჩვენებლებთან შესაბამისობაში. მონაცემები შეიწონა საქართველოს ზრდასრულ მოსახლეობის (18+) პროფილის მიხედვით, რომლებსაც შეუძიათ ხმის მიცემა არჩევნებზე. ცდომილების ზღვარი 2,8%-ია.