ლუკაშენკო ევროკავშირის სანქციების სიაში არ იქნება. ამის შესახებ ინფორმაცია გამოცემა TUT.BY-მ გერმანულ მედია WELT-ზე დაყრდნობით გაავრცელა. გერმანიის, საფრანგეთისა და იტალიის პოზიციის თანახმად, ლუკაშენკოს შავ სიაში მოხვედრა მინსკთან დიალოგის სრულ შეწყვეტას ნიშნავს.

"მიუხედავად ყველაფრისა, ლუკაშენკოსთან დამაკავშირებელი არხები ღია უნდა იყოს", — ნათქვამია აღნიშნული ქვეყნების განცხადებაში.

ამ დრომდე ევროკავშირის ქვეყნები ბელარუსის მთელი რიგი ოფიციალური პირების წინააღმდეგ სანქციებზე ერთსულოვნად თანხმდებოდნენ. მოგვიანებით კი, აზრთა სხვადასხვაობა სანქციების სიაში შემავალმა პირებმა გამოიწვიეს. უფრო კონკრეტულად კი, აღნიშნული ქვეყნებისგან განსხვავებით, ლუკაშენკოს წინააღმდეგ სანქციებს მხოლოდ ბალტიისპირა ქვეყნებმა და პოლონეთმა დაუჭირეს მხარი.

ევროკავშირის დიპლომატების თქმით, ოფიციალური სია უახლოეს ორ კვირაში გამოქვეყნდება. სიაში წარმოდგენილი იქნებიან ის პირები, რომლებიც ბელარუსში მიმდინარე პროცესებში ძალადობასა და ფალსიფიკაციაზე არიან პასუხისმგებელი. დაგეგმილი სანქციები კი ევროკავშირის ქვეყნებში შესვლის აკრძალვასა და ევროპულ ბანკებში ანგარიშების გაყინვას გულისხმობს.

ბალტიისპირა ქვეყნები და პოლონეთი გაცილებით უფრო მკაცრი ზომების მომხრე არიან. ამ ქვეყნებმა ევროკავშირისგან დამოუკიდებელ ზომებს მიმართეს და ბელარუსის 30 ჩინოვნიკს, მათ შორის ლუკაშენკოსაც, საკუთარი ქვეყნების ტერიტორიაზე შესვლა აუკრძალეს.

ბელარუსის საგარეო საქმეთა სამინისტროში განაცხადეს, რომ სანქციებით ბელარუსზე ზეგავლენის მოხდენის მცდელობას საპირისპირო ეფექტი ექნება — მინსკი იძულებული იქნება, "ადეკვატური ზომები" მიიღოს.

სანქციებზე საუბარი ბელარუსში მიმდინარე საპროტესტო აქციებზე ხელისუფლების საპასუხო ქმედებას მოჰყვა. ბელარუსში საპროტესტო გამოსვლები მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ნაწილი პოლიციამ დააკავა, არიან გარდაცვლილებიც. საპროტესტო აქციები ბელარუსში 27 დღეა გრძელდება.

ამავე თემაზე: