ევროკავშირი შეთანხმდა, რომ არჩევნების გაყალბებისთვისა და აქციების დარბევისთვის სანქციებს ბელარუსის 20-მდე მაღალჩინოსანს დაუწესებდნენ და არაა გამორიცხული, რომ სიაში პრეზიდენტი, ალექსანდრე ლუკაშენკოც მოხვდეს. ამის შესახებ ევროკავშირის წევრი ქვეყნების საგარეო საქმეთა მინისტრებმა ბერლინში იმსჯელეს.

"ჩვენ გვაქვს საერთო შეთანხმება იმაზე, როგორ ჩამოყალიბდება სია და ასე თუ ისე, ვინ მოხვდება მასში", — განუცხადა ჟურნალისტებს ჩეხეთის საგარეო საქმეთა მინისტრმა, ტომას პეტრიჩეკმა.

ამასთან, მას მიაჩნია, რომ ლუკაშენკო სანქცირებულთა სიაში უნდა მოხვდეს:

"საკითხი ისაა, რომ [ის სიაში უნდა მოხვდეს] პირველ თუ მომდევნო ეტაპზე, თუ სიტუაცია არ გამოსწორდება".

სიაში ლუკაშენკოს ყოფნას ეთანხმება ლიეტუვის საგარეო საქმეთა მინისტრი, ლინას ლინკევიჩუსიც. თუმცა ის ამბობს, რომ შესაძლებელია არსებობდეს "ტაქტიკური მიზეზები", რის გამოც იგი მის გარეთ უნდა დარჩეს. როგორც გამოცემა AP წერს, ლიეტუვა 118 პირისგან შემდგარი საკუთარი სია წარადგინა.

ევროკავშირის უმაღლესი წარმომადგენელი საგარეო საკითხებში, ჯოზეფ ბორელი ამბობს, რომ ზოგიერთი ქვეყანა ეტაპობრივ მიდგომას ამჯობინებს, რომელიც სიის ეტაპობრივი გაზრდის პარალელურად ზეწოლის უფრო გაზრდასაც ითვალისწინებს

"პირვანდელი სია მოკლე იყო და ბოლო დღეებში გაიზარდა. თავიდან საუბარი იყო 12 პირზე, შემდეგ — თითქმის 20-ზე. ვფიქრობ, რომ ის მომდევნო დღეებშიც გაიზრდება. ყველაფერი იმაზე იქნება დამოკიდებული, თუ როგორ განვითარდება მოვლენები ბელარუსში", — განაცხადა ბორელმა.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.