"აპოლიტიკური პიროვნება ვარ და მიწვეული ვიყავი, როგორც ერთ-ერთი დამსწრე და მხარდამჭერი", — ასე ამართლებს დაავადებათა კონტროლის ეროვნული ცენტრის დირექტორი ამირან გამყრელიძე ქართული ოცნების მაჟორიტარი კანდიდატების წარდგენაზე სტუმრობას. ამავდროულად, გამყრელიძე ამატებს, რომ იქ იმყოფებოდა, როგორც NCDC-ის ხელმძღვანელი.

"წარმოვადგენ ერთ-ერთ ძლიერ ინსტიტუციას, დაავადებათა კონტროლის ეროვნულ ცენტრს, მე იქ მიწვეული ვიყავი როგორც ამ დაწესებულების ხელმძღვანელი", — განაცხადა ამირან გამყრელიძემ.

კოჯორში "ოცნების" კანდიდატების წარდგენაზე, არამხოლოდ პარტიის წევრები, არამედ მათი მხარდამჭერები, ესტრადის, კინოსა და მედიცინის სფეროს წარმომადგენლები იყვნენ მიწვეულები. შეხვედრაზე იმყოფებოდნენ პირველი საუნივერსიტეტო კლინიკის დირექტორი ლევან რატიანი და ინფექციური საავადმყოფოს დირექტორი თენგიზ ცერცვაძეც.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულს კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.