პარლამენტის პირველი ვიცე-სპიკერის, გია ვოლსკის თქმით, გერმანიის ელჩი "თავის ნებაზე" არ ლაპარაკობს და მის უკან მისი სახელმწიფო დგას.

"ელჩი წარმოადგენს სახელმწიფოს და არანაირი არაობიექტურობა ამ ადამიანს არ გამოუჩენია. ეს არ არის ერთ-ერთი ადამიანი ან ერთადერთი, რომელიც თავის თავის ნებაზე ლაპარაკობს. მის უკან დგას სახელმწიფო", — განაცხადა ვოლსკიმ.

დეპუტატი ასევე ამბობს, რომ შალვა ნათელაშვილის განცხადებამ გერმანიის ელჩის გაწვევაზე საქართველოს ხელისუფლების ავტორიტეტს "ჩრდილი მიაყენა".

"ეს დიპლომატიური ეტიკეტია, როცა პოლიტიკური ლიდერი გააკეთებს ისეთ განცხადებას, როგორიც მან თქვა, თუნდაც ომის დაწყებაზე, რასაკვირველია, ვალდებულია საგარეო საქმეთა სამინისტრო ხაზი გაუსვას, რომ ეს არ არის პოზიცია, რომელსაც იზიარებენ სხვა პოლიტიკური პარტიები. თუმცა, ასეთი უარყოფა, ამ ხეპრული განცხადების, არ გაუკეთებიათ ჩვენს ოპონენტ პოლიტიკურ პარტიებს",— განაცხადა ვოლსკიმ.

გერმანიის ელჩმა ჰუბერტ ქნირშმა თქვა, რომ 8 მარტის შეთანხმებაში გიორგი რურუა ნახსენები არ ყოფილა. ეს განაცხადი მან 26 ივნისს ინტერპრესნიუსის ჟურნალისტის კითხვის პასუხად გააკეთა, სადაც ასევე ისაუბრა იმაზეც, რომ შეთანხმების იმპლემენტაციისთვის ორშაბათი, ანუ საკონსტიტუციო ცვლილებების მესამე მოსმენა გადამწყვეტი იქნება.

"ბატონი რურუა არ არის ნახსნები ამ შეთანხმებაში. ეს ძალიან მკაფიოა, ყველას შეუძლია ამის წაკითხვა. გაკვირვებული ვარ, იმ დისკუსიის გამო, რაც პოლიტიკურ პარტიებს შორის გაიმართა, ერთმანეთის დადანაშაულების მცდელობა, როცა ოპოზიცია მმართველ პარტიას ადანაშაულებს კანონპროექტის ჩავარდნაში და პირიქით", — თქვა მან.

ამ განცხადების შემდეგ, ლეობორისტული პარტიის ლიდერმა, შალვა ნათელაშვილმა გერმანიის ელჩი ივანიშვილის ლობისტად მოიხსენია და მისი გაწვევა მოითხოვა.

მთავარი არხის მეწილის, გიორგი რურუას გათავისუფლებას ოპოზიციის წარმომადგენლები ითხოვენ. ისინი რურუას პოლიტიკურ პატიმრად მოიხსენიებენ. როგორც ნაციონალური მოძრაობა და ევროპული საქართველო აცხადებენ, რურუას გათავისუფლება, სხვა პოლიტპატიმრებთან ერთად, 8 მარტის შეთანხმების ნაწილი იყო. აღნიშნულ შეთანხმებას უარყოფენ მმართველ გუნდში და ამბობენ, რომ სასამართლოს სისტემაზე გავლენას ვერ იქონიებენ.