2015 წელს, საქართველოში ოჯახში ძალადობის 2 726 ფაქტი გამოვლინდა, რომელშიც 5 106 პირი მონაწილეობდა. მოძალადისა და მსხვერპლის შესახებ არსებული სტატისტიკური მონაცემების თანახმად, მოძალადეთა 93% კაცია. ეს მონაცემემები წერია სახალხო დამცველის მიერ წარმოდგენილი ანგარიშში "ქალთა უფლებრივი მდგომარეობა და გენდერული თანასწორობა". ანგარიშის პრეზენტაცია დღეს, 13 მაისს გაიმართა.

სახალხო დამცველის ანგარიშის მიხედვით, 112-ის სამსახურში შესაძლო ოჯახში ძალადობის შესახებ მიღებული შეტყობინებების რაოდენობა 2015 წელს იყო 15 910, 2014 წელს კი - 9 260. როგორც უჩა ნანუაშვილი მიუთითებს, ეს ინფორმაცია პირველადია და არაერთი რეკომენდაციის მიუხედავად, არ გაანალიზებულა.

ომბუდსმენი ოჯახში ძალადობის მსხვერპლთა ასაკობრივ გადანაწილებას განიხილავს და აღნიშნავს, რომ ყველაზე დიდ რისკ ჯგუფს (56%) წარმოადგენენ 25-დან 44 წლამდე ასაკის ქალები და 45 წელზე მეტი ასაკის კაცები.

სახალხო დამცველის ანგარიში

სახალხო დამცველის ანგარიში

სახალხო დამცველის ანგარიშის პრეზენტაცია, 13 მაისი, 2016

ფოტო: გვანცა ნემსაძე

სახალხო დამცველი ოჯახში ძალადობის შესახებ რეგიონებში არსებულ დაბალ მიმართვიანობაზე მიუთითებს. ანგარიშის მიხედვით, განსაკუთრებით დაბალი მაჩვენებელია რაჭა-ლეჩხუმის, მცხეთა-მთიანეთის, სამცხე-ჯავახეთისა და გურიის რეგიონებში.

რაც შეეხება ოჯახში ძალადობის შემთხვევებზე რეაგირებას, ომბუდსმენი პრობლემას კოორდინაციასა და ინფორმაციის ურთიერთგაცვლაში ხედავს. ანგარიშის თანახმად, რამდენიმე შემთხვევაში სამართალდამცავი უწყებებისა და სოციალური მომსახურეობის სააგენტოს მიერ მოწოდებული ინფორმაცია ერთმანეთს ეწინააღმდეგებოდა.

სახალხო დამცველი საქართველოში ფემიციდის ფაქტებზე წერს, რომ 2015 წელს, ქალთა მკვლელობების თუ მკვლელობის მცდელობის 28 შემთხვევა გამოვლინდა. მათი უმრავლესობა ჩადენილია პარტნიორის, ყოფილი პარტნიორის ან პირის მიერ, რომელსაც უარი ეთქვა პარტნიორულ ურთიერთობაზე.

კვლევაში განსაკუთრებით არის ყურადღება გამახვილებული ქალთა თვითმკვლელობამდე მიყვანის ფაქტებზე, რისი მიზეზიც, ანგარიშის თანახმად, ოჯახში ძალადობა გახდა.

სახალხო დამცველის მიერ შესწავლილი შემთხვევებიდან იკვეთება, რომ თვითმკვლელობამდე მიყვანის კვალიფიკაცია, ხშირად, იმიტომ ვერ ხერხდება, რომ ძალადობის ფაქტები სამართალდამცავი ორგანოებისათვის გარდაცვალებამდე არ ხდება ცნობილი.

თვითმკვლელობის შემთხვევებიდან გამომდინარე, ომბუდსმენი აღნიშნავს, რომ ქალთა მიმართ ძალადობის ერთ ერთი უმძიმესი შედეგი თვითმკვლელობამდე მიყვანაა, ხოლო ყველაზე სამწუხარო ტენდენცია კი დანაშაულის ჩამდენის დასჯის სირთულეა.