ინფექციური საავადმყოფოს კლინიკური დირექტორის, მარინა ეზუგბაიას თქმით, დღეს, 18 ივნისს საქართველოში დადასტურებული კორონავირუსის 5 ახალი შემთხვევიდან ყველა შემოტანილია. ამ თემაზე მან კომენტარი მედიასთან გააკეთა.

"5 ახალი პაციენტიდან ყველა შემოტანილი შემთხვევა, ანუ იმპორტირებული და 4 არის სატვირთო მანქანის მძღოლი", — თქვა მარინა ეზუგბაიამ.

მისი თქმით, 5 ახალი შემთხვვეიდან 1 მათ კლინიკაშია მოთავსებული, დღეს გამოჯანმრთელებული 8 პაციენტიდან 7 კი, ასევე, ინფექციური საავადმყოფოდან გაეწერა.

ბოლო მონაცემებით, ქვეყანაში სულ დადასტურებულია კორონავირუსის 893 შემთხვევა, მათ შორის გამოჯანმრთელებულია 739 ადამიანი, ხოლო გარდაცვლილია — 14. კარანტინის რეჟიმში 2 710 პირი რჩება, სტაციონარში მეთვალყურეობის ქვეშ — 267.

5 ახალი შემთხვევიდან ერთი გუშინ, 17 ივნისს ზუგდიდში დადასტურდა. ინფიცირებული პაციენტი რუსეთიდან 12 ივნისს შემოვიდა. ზუგდიდი საზოგადოებრივი ჯანდაცვის ცენტრის ხელმძღვანელის, ნანა ოდიშარიას თქმით, პაციენტის შვიდი კონტაქტი კარანტინშია გადაყვანილი, ხოლო 15 თვითიზოლაციაში.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: