27 მაისს ინდოეთიდან საქართველოში 15 მოქალაქე დაბრუნდება. საგარეო საქმეთა სამინისტროს ინფორმაციით, დელი-თბილისი-დელის ავიარეისს Air India შეასრულებს და საქართველოში ინდოეთში მყოფი აზერბაიჯანის 18 მოქალაქეც გამოფრინდება.

ინდოეთის გოას, რაჯასტანისა და მაჰარაშტრას შტატებიდან საქართველოსა და აზერბაიჯანის მოქალაქეები საელჩოს მიერ დაქირავებული ტრანსპორტით დელში გადაიყვანეს.

მსოფლიოში კორონავირუსის გავრცელების გამო საქართველოსა და ინდოეთში საგანგებო მდგომარეობის გამოცხადების შემდეგ დახმარება გაეწია ინდოეთის სხვადასხვა შტატში მყოფ 43 საქართველოს მოქალაქეს. სამინისტროში აცხადებენ, რომ ინდოეთის მხარესთან კოორდინაციით, ყველა მოქალაქეს საელჩომ ხელი შეუწყო სავიზო პროცედურების მოგვარების საკითხში. გოას შტატში მყოფი 5 საქართველოს მოქალაქე საელჩომ უზრუნველყო სასტუმროთი და საკვებით, 2 მოქალაქე საცხოვრებელი ბინით, ხოლო 17 მოქალაქეს ორჯერ გაეგზავნა ცხელი საკვები და საკვები პროდუქტებისა და პირველადი მოხმარების საგნების მარაგი.