საგარეო საქმეთა სამინისტროს პრესსპიკერის, მარი ნარჩემაშვილის თქმით, უკრაინიდან კონსულტაციებზე გამოძახებული ელჩის უკან დაბრუნების თარიღი უკრაინი მიერ გადადგმულ ნაბიჯებზე იქნება დამოკიდებული.

მისი თქმით, დღეს საგარეო უწყებაში დაბარებული ელჩისგან დღევანდელი მოცემულობაში უკრაინა-საქართველოს ორმხრივი ურთიერთობების პერსპექტივაზე ინფორმაცია მოისმინეს.

"ელჩის კონსულტაციებზე გამოძახება არ გულისხმობს ორ ქვეყანას შორის დიპლომატიური ურთიერთობების გაწყვეტას. რა თქმა უნდა, არ იგეგმება უკრაინასთან სტრატეგიულ პარტნიორობის გადახედვა. ქართული მხარე დააკვირდება უკრაინაში პროცესების განვითარებას, მათ შორის იმას, თუ რა შემხვედრ ნაბიჯებს გადადგამს უკრაინის ხელისუფლება საქართველოსთან ურთიერთობის ნორმალიზების თვალსაზრისით და ამის შედეგად იქნება მიღებული გადაწყვეტილება უკრაინაში საქართველოს ელჩის დაბრუნების თარიღთან დაკავშირებით", — განაცხადა ნარჩემაშვილმა.

უკრაინაში საქართველოს ელჩი, თეიმურაზ შარაშენიძე ორკვირიანი კარანტინის შემდეგ საგარეო საქმეთა სამინისტროში კონსულტაციებისთვის დღეს, 25 მაისს მივიდა. როგორც მან ჟურნალისტებს განუცხადა, ის არ იზიარებს კრიტიკას, რომ საელჩომ ცუდად იმუშავა.

საქართველოს მთავრობამ უკრაინიდან კონსულტაციებისთვის ელჩოს გამოწვევა მას შემდეგ გადაწყვიტა, რაც პრეზიდენტ ვოლოდიმირ ზელენსკიმ საქართველოს ყოფილი პრეზიდენტი, მიხეილ სააკაშვილის რეფორმების საბჭოს ხელმძღვანელად დანიშნა.