ექიმი ოკუპირებული ცხინვალის რეგიონიდან ამბობს, რომ დე-ფაქტო რესპუბლიკაში კორონავირუსთან გასამკლავებლად სპეციალისტები არ ეყოფათ. BBC-სთან საუბრისას მან განაცხადა, რომ მთელ რეგიონში 26 ხელოვნური სუნთქვის აპარატი აქვთ და მისი გამოყენება დაახლოებით შვიდმა ადამიანმა იცის.

მისი თქმით, მხოლოდ 25 პაციენტის მართვას შეძლებენ, ინფიცირებულთა ზრდის შემთხვევაში კი პრობლემები შეექმნებათ.

"ხელოვნური სუნთქვის აპარატზე ადამიანის მიერთება მარტივი პროცედურა არ არის. ამისთვის გამოცდილი ანესთეზიოლოგი და რეანიმატოლოგია საჭირო. მთელს რესპუბლიკაში ამ დავალებასთან გამკლავება რამდენიმე ადამიანს შეუძლია: ერთი მე ვარ, 4-6 ჩემი სტუდენტია და მორჩა", — განუცხადა გამოცემას ცხინვალის მედცენტრის მთავარმა რეანიმატოლოგმა, ალექსანდრ პლიევმა.

მიუხედავად იმისა, რომ რესურსების ნაკლებობას თავადაც აღიარებენ, საოკუპაციო რეჟიმი საქართველოს დახმარებაზე უარს ამბობს და პირადი ნაცნობობის იმედადაა. BBC-სთან საუბრისას პლიევი აღნიშნავს, რომ პრობლემების შემთხვევაში დასახმარებლად რუს კოლეგებს მიმართავს.

"ისინი ჩემი პირადი ნაცნობები არიან. ხალხი, რომლებსაც ვენდობი, როგორც პროფესიონალებს. დამპირდნენ, რომ საჭიროების შეთხვევაში ჩამოვლენ", — განაცხადა მან.

ოკუპირებულ რეგიონში პრობლემები აქვთ სამედიცინო აღჭურვილობის მხრივაც. მაგალითად, Jam News-მა აპრილის დასაწყისში გაავრცელა ინფორმაცია, რომ აღჭურვილობის არარსებობის გამო, ქირურგმა კლინიკაში მისვლაზე უარი თქვა.

დე ფაქტო ხელისუფლება ამტკიცებს, რომ სამხრეთ ოსეთში კორონავირუსით ინფიცირების შემთხვევა ჯერ არ დაფიქსირებულა, თუმცა ქართულ მხარეს ამის არ სჯერა.

საოკუპაციო რეჟიმის გადაწყვეტილებით, არსებული შეზღუდვები 30 აპრილამდე გაგრძელდება. ამ ეტაპზე ისევ უცნობია, როდის გაიხსნება ე.წ. გამშვები პუნქტები.

მსგავსი სიტუაციაა ოკუპირებულ აფხაზეთშიც. ექიმები ამბობენ, რომ ეპიდემიის სამართავად რესურსი არ ეყოფათ, თუმცა თბილისის დახმარებაზე უარს ამბობენ. დე ფაქტო ხელისუფლება ამტკიცებს, რომ ინფიცირების მხოლოდ 3 შემთხვევაა დადასტურებული და მათ მოახერხეს კონტაქტების იზოლირება, რითიც ვირუსის გავრცელება ამ ეტაპზე აღმოფხვრეს. ქართულ მხარეს არც ამ მონაცემების სჯერა.

ოკუპირებულ რეგიონში მაცხოვრებლების დასახმარებლად, გამყოფი ხაზის მიმდებარედ, რუხში საავადმყოფო აშენდა, სადაც კორონავირუსით ინფიცირებული პაციენტების მკურნალობაა შესაძლებელი. თუმცა, აფხაზეთის დე ფაქტო ხელისუფლება უარზეა ამ კლინიკით ისარგებლოს. მათი თქმით, ეთნიკურად ქართველები "როგორღაც" ახერხებენ ე.წ. საზღვარზე გადაპარვას და ისინი "ამაზე თვალს ხუჭავენ", თუმცა თავისი ინიციატივით სამკურნალოდ ისინი არავის გაშვებას აპირებენ.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: