საგარეო საქმეთა სამინისტროს ინფორმაციით, ევროსაბჭოს 2020 წლის მინისტერიალი საქართველოს თავმჯდომარეობით აღარ ჩატარდება. უწყების ცნობით, მინისტერიალი 2020 წლის 4 ნოემბერს, ქალაქ ათენში გაიმართება და მისი თავმჯდომარე რიგით საქართველოს შემდგომი ქვეყანა — საბერძნეთი იქნება.

"2020 წლის 22 აპრილს, ევროპის საბჭოს მინისტრთა მოადგილეების კომიტეტის სხდომაზე, რომელიც საქართველოს თავმჯდომარეობის ძალისხმევით პირველად გაიმართა ვიდეო–კონფერენციის ფორმატში, მიღებულ იქნა გადაწყვეტილება COVID-19-ის გავრცელების პრევენციის მიზნით, ევროპის საბჭოს მინისტრთა კომიტეტის 130–ე შეხვედრის გამართვის თარიღისა და ადგილის ცვლილების შესახებ", — წერია სამინსიტროს განცხადებაში.

საგარეო საქმეთა მინისტრის, დავით ზალკალიანის განცხადებით, ევროპის საბჭოს 47 წევრმა ქვეყანამ COVID-19-ის პანდემიასთან დაკავშირებით მიიღო მინისტრთა კომიტეტის დეკლარაცია. უწყების განცხადებით, დეკლარაციაში აღნიშნულია, რომ ევროპის საბჭოს დაარსებიდან დღემდე, COVID-19-ის პანდემია ჯანმრთელობის დაცვასთან დაკავშირებულ ყველაზე მწვავე კრიზისს და უპრეცედენტო გამოწვევას წარმოადგენს და ადამიანთა ჯანმრთელობის დაცვისთვის ყველაფერი უნდა გაკეთდეს.

თავდაპირველად დაგეგმილი იყო, რომ მინისტერიალი 15 მაისს, ქალაქ სტრასბურგში საქართვლოს თავმჯდომარეობით გაიმართებოდა.