დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს ჯანდაცვის მინისტრმა, ეკატერინე ტიკარაძემ მთავრობის მიერ ავტომანქანების გადაადგილების აკრძალვის შესახებ გადაწყვეტილებაზე თქვა, რომ ამას კავშირი არ აქვს აღდგომის ღამეს ეკლესიებში მისვლასთან. ამის შესახებ მინისტრმა 16 აპრილს, ბათუმში, ჟურნალისტებთან საუბრისას განაცხადა:

"თუ ჩვენ დავაკვირდებით ჩვენი ტაძრების გეოგრაფიულ გადანაწილებას საქართველოს ნებისმიერ ქალაქში, მანქანების გადადგილება ვერ შეაფერხებს ტაძარში შესვლას. შესაბამისად, ამ ორ ფაქტს შორის არანაირი კავშირი არაა. ეს არის უბრალოდ გამკაცრებული ღონისძება".

ხვალიდან, 17 აპრილის 12 საათიდან ქვეყანაში სრულად იკრძალება მსუბუქი ავტომობილებით გადაადგილება. შეზღუდვა იმოქმედებს საგანგებო მდგომარეობის ვადით, 21 აპრილის ჩათვლით. მისივე თქმით, შეზღუდვა არ ვრცელდება ტვირთების გადაზიდვაზე და დისტრიბუციაზე. ჩვეულებრივ იმუშავებენ სასურსათო მაღაზიები, აფთიაქები და მიტანის სერვისები. გარდა ამისა, ხვალიდან სავალდებულო ხდება პირბადეების ტარება. პასუხისმგებლობა ეკისრებათ იურიდიულ პირებს. შეზღუდვები წესდება სასაფლაოებზე შესვლასთან დაკავშირებითაც.

ამასთან, 15 აპრილს საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება. ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა.