მრავალი ადამიანი ცდილობს ნეტფლიქსის ახალი დოკუმენტური სერიალის, Tiger King-ის წარმოუდგენელი პოპულარობის საიდუმლო ამოხსნას — ისტორიის დაუჯერებელმა ფაქტებმა განაპირობა ეს თუ კარანტინში ადამიანების ზედმეტმა თავისუფალმა დრომ? — მაგრამ, რაც არ უნდა იყოს, ბოლო 3 კვირის განმავლობაში ყველაზე ხშირად ინტერნეტ სივრცეში სწორედ ამ შოუზე საუბრობენ.

ამას ცხადყოფს ცოტა ხნის წინ მარკეტინგული კვლევის კომპანია Nielsen-ის მიერ გამოქვეყნებული სტატისტიკაც, რომლის მიხედვითაც Tiger King პრემიერიდან (20 მარტი) პირველი 10 დღის განმავლობაში (29 მარტამდე) აშშ-ში 34 მილიონზე მეტმა მაყურებელმა ნახა.

მაგალითისთვის, იმავე სტატისტიკით Stranger Things-ის მეორე სეზონს 31,2 მილიონი მაყურებელი ჰყავდა პირველ ათ დღეში, მესამე სეზონს კი 36,3 მილიონი. შესაბამისად, Tiger King-მა 34.2 მილიონი უნიკალური მნახველით ისეთი ცნობილი სერიალის, როგორიცაა Stranger Things, მეორე სეზონის მაჩვენებელი გააუმჯობესა, მესამე სეზონის შედეგს კი მიუახლოვდა.

ასევე აღსანიშნავია, რომ ამ დოკუმენტურ სერიალს პირველივე დღეს 280 000 მაყურებელი ჰყავდა აშშ-ში, მაშინ როცა Mindhunter-ისა მეორე სეზონი პრემიერის დღეს 395 000-მა ადამიანმა ნახა. თუ გავითვალისწინებთ იმას, რომ Tiger King თავდაპირველად მაყურებლებისთვის სრულიად უცხო შოუ იყო, ვიდრე ვთქვათ Mindhunter-ის ან Stranger Things-ის მეორე სეზონები, ეს წარმოუდგენლად კარგი მაჩვენებელია.

Tiger King შვიდი ეპიზოდისგან შემდგარი დოკუმენტური სერიალია, რომელიც ზოოპარკის ცნობილი მმართველის, ჯოზეფ მალდონადოს შოკისმომგვრელი ისტორიისა და კრიმინალური გამოძიების შესახებ გვიამბობს.

როგორც უკვე ვიცით, წარმოუდგენელი პოპულარობის გამო ნეტფლიქსი მალე დამატებით ახალ ეპიზოდს გამოუშვებს.