არ აქვს მნიშვნელობა თავად რამდენად ხშირად უყურებთ სერიალებს ან უკვე მოასწარით თუ არა ნეტფლიქსის გახმაურებული დოკუმენტური შოუს, Tiger King-ის ნახვა — მის შესახებ უამრავი პოსტსა და მაყურებლების აღტკინებულ განხილვებს სოციალურ ქსელებში თვალს მაინც ვერ აარიდებდით.

როგორც ჩანს, ეს საყოველთაო ყურადღება ნეტფლიქსმაც შესაბამისად შეამჩნია და გადაწყვიტა, მაყურებლები დამატებითი ეპიზოდით გაახაროს. ამის შესახებ ზოოპარკის მეპატრონემ, ჯეფ ლოუიმ 4 აპრილს ტვიტერზე გამოქვეყნებული პოსტით გვამცნო:

"ნეტფლიქსი კიდევ ერთ სერიას ამატებს შოუს და ის შემდეგ კვირას გამოვა. მისი გადაღებები ხვალ აქ იქნება", — ამბობს ის ვიდეოში.

ჯერჯერობით უცნობია, თუ რა ფორმატის იქნება ახალი ეპიზოდი: ისტორიის თანმიმდევრული გაგრძელება თუ უბრალოდ ინტერვიუ ამ ამბის მონაწილეებთან ან სხვა მსგავსი შინაარსის სერია ერთგული მაყურებლებისთვის. ამასთან დაკავშირებით ნეტფლიქსს ჯერ ოფიციალური კომენტარი არ გაუკეთებია.

Tiger King-ს პრემიერა 20 მარტს შედგა და ის ბოლო პერიოდში, განსაკუთრებით მაშინ, როცა მსოფლიო მოსახლეობის გარკვეული ნაწილი კარანტინშია, ყველაზე განხილვად შოუდ იქცა. ეს 7 სერიისგან შემდგარი დოკუმენტური სერიალი ზოოპარკის ცნობილი მმართველის შოკისმომგვრელი ისტორიის შესახებ გვიამბობს.