შინაგან საქმეთა სამინისტროს განმარტებით, პირებმა, რომლებიც საგანგებო მდგომარეობის რეჟიმის დარღვევისთვის დაჯარიმდებიან თანხა 30 დღის ვადაში უნდა გადაიხადონ. უწყების განცხადებით, სახელმწიფოს ცხელი ხაზის — 144-ის პასუხი, რომ მოქალაქეებს ჯარიმის გადახდის ვადა 21 აპრილის შემდეგ აეთვლებათ ავტოსაგზაო შემთხვევებს გულისხმობს და არა სხვა ადმინისტრაციულ ჯარიმას.

დაკისრებული ჯარიმის გასაჩივრება მოქალაქეს საგანგებო მდგომარეობის დასრულებამდე ელექტრონულად შეუძლია. შსს-ში ამბობენ, რომ თუ ელექტრონულ მომსახურებაზე ვინმეს პრობლემა აქვს, სახელმწიფო გასაჩივრების ვადას საგანგებო მდგომარეობის დასრულებიდან 10 დღის ვადით გაახანგრძლივებს.

"პირი უფლებამოსილია დაკისრებული ჯარიმა გაასაჩივროს საგანგებო მდგომარეობის დასრულებიდან 10 დღის ვადაში. მთავრობის დადგენილება პირს არ ართმევს გასაჩივრების უფლებას, არამედ მხოლოდ, უხანგრძლივებს გასაჩივრების კანონით დადგენილ ვადებს. შესაბამისად, პირს შეუძლია დაკისრებული ჯარიმა გაასაჩივროს შესაბამის ადმინისტრაციულ ორგანოში ან სასამართლოში", — განმარტავენ უწყებაში.

საქართველოში საგანგებო მდგომარეობა 21 მარტს გამოცხადდა და ის 21 აპრილამდე გაგრძელდება. პრემიერ-მინისტრის განმარტებით, საგანგებო მდგომარეობისას დაწესდა რიგი შეზღუდვები და განისაზღვრა, რომ საგანგებო მდგომარეობის რეჟიმის დარღვევისთვის, ფიზიკური პირი დაჯარიმდება 3 ათასი ლარის ოდენობით, ხოლო იურიდიული პირი 15 ათასით. განმეორებითი ქმედება გამოიწვევს სისხლის სამართლებრივ პასუხისმგებლობას 3 წლამდე თავისუფლების აღკვეთით.

ამასთან, საქართველოს მთავრობის #181 დადგენილების მე-13 მუხლის პირველი პუნქტის თანახმად, საგანგებო მდგომარეობის ვადით ჩერდება კანონმდებლობით დადგენილი ადმინისტრაციული საჩივრის წარდგენისა და განხილვის ვადები.

30 მარტს საქართველოში გიორგი გახარიამ "ფაქტობრივი კარანტინი" გამოაცხადა, რის შემდეგაც ქვეყანაში ახალი შეზღუდვები ამოქმედდა. მოქალაქეებისთვის 21:00 საათიდან დილის 06:00 საათამდე იკრძალება როგორც ქვეითად, ისე ტრანსპორტით ქალაქებში და ქვეყნის მასშტაბით გადაადგილება.

სრულიად იკრძალება ნებისმიერი ტიპის საზოგადოებრივი ტრანსპორტით გადაადგილება, მათ შორის მეტროთი, როგორც ქალაქებსა და მუნიციპალიტეტებს შიგნით, ასევე ქალაქებს შორის. დასაშვებია მხოლოდ მსუბუქი ავტომობილებით, მათ შორის ტაქსით მგზავრობა მხოლოდ იმ შემთხევაში, თუ გათვალისწინებული იქნება ჯანდაცვის სამინისტროს რეკომენდაციები — მანქანაში იქნება მხოლოდ სამი ადამიანი და აქედან ორი აუცილებლად უკანა სავარძელზე.

გაიგეთ მეტი:

• კარანტინის პერიოდში მოქალაქეებმა თან უნდა ატარონ პირადობის დამადასტურებელი დოკუმენტი;
• 70 წელს ზემოთ მოქალაქეებს აფთიაქისა და მაღაზიის გარდა სახლიდან გასვლა ეკრძალებათ;
• საყოველთაო კარანტინის პირობებში იკრძალება 3-ზე მეტი პირის თავშეყრა;
• რა შეზღუდვები იქნება კარანტინის დროს — მოკლედ.

ბოლო მონაცემებით, საქართველოში კორონავირუსით ინფიცირება დაუდასტურდა 195 ადამიანს, მათგან 46 გამოჯანმრთელებული, 3 გარდაცვლილი. კარანტინის რეჟიმში 4 708 ადამინი რჩება, სტაციონარში მეთვალყურეობის ქვეშ — 370.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე:

• აუცილებელი რეკომენდაციები კორონავირუსისგან თავის დასაცავად
• Ի՞նչ է նոր կորոնավիրուսը — რეკომენდაციები კორონავირუსის პრევენციისთვის სომხურ ენაზე
• Yeni koronavirus nədir? — რეკომენდაციები კორონავირუსის პრევენციისთვის აზერბაიჯანულ ენაზე
• რეკომენდაციები თვითიზოლაციაში მყოფი პირებისთვის
• რეკომენდაციები კარანტინში მყოფებისთვის
• როგორ უნდა გაიკეთოთ, გამოიყენოთ და გადააგდოთ ნიღაბი
• როგორ დავიბანოთ ხელები სწორად კორონავირუსისგან დასაცავად
• როგორ უნდა მოიქცეთ სახლიდან გასვლისას და სახლში დაბრუნებისას