მოსამართლე ნათია გუდაძემ 400-ლარიანი ჯებირის დაზიანების ბრალდებით დაკავებული ახალგაზრდების, 19 წლის ომარ ოკრიბელაშვილისა და 23 წლის საბა მეფარიშვილის პატიმრობა კვლავ ძალაში დატოვა.

ისინი პარლამენტის წინ მიმდინარე რუსული კანონის საწინააღმდეგო აქციების დროს დააკავეს 2024 წლის 12 მაისს. ახალგაზრდებს დაკავების დღიდან აღკვეთის ღონისძიების სახით პატიმრობა აქვთ შეფარდებული, ხოლო სასჯელის სახით 3-6 წლამდე თავისუფლების აღკვეთა ემუქრებათ.

მიუხედავად იმისა, რომ დამდგარი ზიანი – 400 ლარი ორგანიზაცია DRI-იმ ივლისში გადაიხადა, მოსამართლემ აღკვეთის ღონისძიება არ შეცვალა და ახალგაზრდები ციხეში დატოვა.

ბრალდებულების ბოლო პროცესი სექტემბერში იყო, ამ სხდომაზე მათ პროტესტი გამოთქვეს მომდევნო პროცესის ნოემბერში ჩანიშვნის გამო. დაცვის მხარის აზრით, პროცესი ხელოვნურად ჭიანურდება.