გასულ ღამეს, როგორც კი სიტუაცია დაიძაბა, გამოძახებულ იქნა "ვიქტორია სექურითის" დამატებითი ოპერატიული ჯგუფი, რომელთა შორის ორი პირი ფორმის გარეშე გამოცხადდა. შესაბამისი გაფრთხილება კომპანიამ უკვე მიიღო, რომ სამომავლოდ უფორმოდ არავინ მოგვემსახუროს," — შესაბამისი წერილი ადმინისტრაციისგან უნივერსიტეტის თანამშრომლებმა პირად მეილზე მიიღეს.

NEWS.On.ge-ს აღნიშნული წერილი წყარომ მიაწოდა.

წერილის ტექსტს სრულად გთავაზობთ:

"მოგესალმებით, როგორც მოგეხსენებათ, ბოლო რამდენიმე დღეა თსუ გახდა ქვეყანაში მიმდინარე მოვლენების ეპიცენტრი. ამასთან დაკავშირებით, სამწუხაროდ, ვრცელდება უამრავი ცრუ ინფორმაცია. თსუ ადმინისტრაცია თავს ვალდებულად თვლის, საუნივერსიტეტო საზოგადოებას მიაწოდოს დეტალური ინფორმაცია მიმდინარე მოვლენებზე.

19 ნოემბერს, თსუ-ის პირველი კორპუსის ეზოში შემოვიდა პოლიცია. ამასთან დაკავშირებით, გვსურს განვმარტოთ რომ: შსს ინფორმაციით, 19 ნოემბრის დილის 7 საათისთვის, თბილისის სახელმწიფო უნივერსიტეტის ეზოში პოლიცია მას შემდეგ შემოვიდა, რაც თსუ-ს ცენტრალურ შესასვლელთან ცეცხლის რამდენიმე კერა დაფიქსირდა. უნივერსიტეტის ადმინისტრაცია ფლობს გარე კამერების ვიდეომასალას, სადაც ჩანს, რომ 19 ნოემბერს არცერთ პოლიციელს არ უსარგებლია თსუ-ს შენობა-ნაგებობით, მათი ერთი ნაწილი შემოვიდა პირველ და მეორე კორპუსებს შორის არსებული შემოსასვლელიდან, მეორე ნაწილი კი - ვარაზისხევიდან და გადაადგილდებოდნენ ეზოში, რომელიც ღია, საჯარო სივრცეა. ვიდეომასალიდან, ასევე, ნათლად ჩანს, როდის დატოვა პოლიციამ თსუ-ს ეზო. დაინტერესების შემთხვევაში, თსუ-ის ადმინისტრაცია მზადაა გაგიზიაროთ გარეკამერების ვიდეოჩანაწერები. ვიდეოჩანაწერები, უკვე, მიეწოდა დაინტერესებულ მედიასაშუალებებს.

როგორც მოგეხსენებათ, თსუ პირველი კორპუსის 023-ე აუდიტორია დაკავებული აქვთ როგორც ჩვენი, ასევე, სხვა უნივერსიტეტის სტუდენტებს. თსუ რექტორმა პირველივე დილას მოინახულა სტუდენტები, სადაც შეთანხმდნენ, რომ შეხვდებოდნენ ერთმანეთს. თუმცა, მოგვიანებით სტუდენტებმა გაურკვეველი მიზეზების გამო, უარი თქვეს შეხვედრაზე. შემდგომ კი განაცხადეს, რომ რექტორს შეხვდებოდნენ მხოლოდ მედიის თანდასწრებით. რექტორი ნებისმიერ დროს მზად არის შეხვდეს უნივერსიტეტის სტუდენტებს საქმიან გარემოში, ყოველგვარი გარე ჩარევების გარეშე.

მოგეხსენებათ, რომ სტუდენტები არ არიან შეზღუდულნი საკუთარი აზრის და პოზიციის დაფიქსირებაში და მათ ყველანაირი პირობა აქვთ შექმნილი ამისათვის. თუმცა, გასულ ღამეს, 023-ე აუდიტორიაში მყოფმა სტუდენტებმა გადაწყვიტეს სხვადასხვა აუდიტორიისა და ადმინისტრაციული ოთახის დაკავება. ამის შესაძლებლობა მათ უნივერსიტეტის დაცვამ არ მისცა (არსებობს ამის დამადასტურებელი ვიდეომასალა). უნივერსიტეტის დაცვასთან ერთად, შენობაში უსაფრთხოების წესებს იცავს კერძო კომპანია “ვიქტორია სექურითი”, რომელიც უნივერსიტეტთან დიდი ხანია თანამშრომლობს სატენდერო ხელშეკრულების ფარგლებში და გვეხმარება ფართომასშტაბიანი ღონისძიებების (სწავლის დაწყება-დასრულების, საახალწლო და სხვა მრავალრიცხოვანი სტუდენტური ღონისძიებების) დროს უსაფრთხოების ნორმების დაცვაში.

გასულ ღამეს, როგორც კი სიტუაცია დაიძაბა, გამოძახებულ იქნა "ვიქტორია სექურითის" დამატებითი ოპერატიული ჯგუფი, რომელთა შორის ორი პირი ფორმის გარეშე გამოცხადდა. შესაბამისი გაფრთხილება კომპანიამ უკვე მიიღო, რომ სამომავლოდ უფორმოდ არავინ მოგვემსახუროს.

თბილისის სახელმწიფო უნივერსიტეტი პატივს სცემს სტუდენტების, პროფესორ-მასწავლებლებისა და ადმინისტრაციის თანამშრომლების აზრის გამოხატვის თავისუფლებას და ამავე დროს, პასუხისმგებელია მათი უსაფრთხოების დაცვასა და სასწავლო და სამუშაო პროცესის სრულფასოვან წარმართვაზე." — ნათქვამია თანამშრომლებისთვის გაგზავნილ წერილზე.

NEWS.On.ge დაცვის კომპანია "ვიქტორია სექურითის" დაუკავშირდა. კომპანიის წარმომადგენელმა გვითხრა, რომ აღნიშნულ კითხვაზე წერილობით გვიპასუხებდნენ.

შესაბამისი ინფორმაციის მიღების შემდეგ მასალა განახლდება.

შეგახსენებთ, თბილისის სახელმწიფო უნივერსიტეტში სტუდენტების ნაწილი მესამე დღეა აპროტესტებს თსუ-ს შენობის შსს-ს წარმომადგენლებისთვის დათმობას.

ისინი უნივერსიტეტის პირველ კორპუსში პროტესტის ნიშნად ღამეს ათევენ და რექტორის გადადგომას მოითხოვენ.

სტუდენტების თქმით, მათ ნახეს როგორ გამოვიდნენ საპოლიციო ძალები უნივერსიტეტის შენობიდან იმ დილით, როცა მელიქიშვილის ქუჩაზე შეკრებილი აქციის მონაწილეები ძალის გამოყენებით დაშალეს.

აღნიშნულს საჯარო განცხადებით გამოეხმაურნენ პროფესორ-მასწავლებლებიც, მათ აგრეთვე დაგმეს საგანმანათლებლო სივრცის საპოლიციო ძალებისთვის დათმობის ფაქტი და უნდობლობა გამოუცხადეს რექტორის განმარტებას იმის თაობაზე, რომ საპოლიციო ძალებს დარბევის წინ უნივერსიტეტის შენობა არ გამოუყენებიათ.