დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ხვალიდან საქართველოში კარანტინია. ეს იმას ნიშნავს, რომ ქვეყანაში ახალი შეზღუდვები დაწესდა. 31 მარტის დილის 08:00 საათიდან ბევრი რამ განსხვავებულად იქნება, საღამოს 21:00 საათიდან კი გადაადგილებაც აიკრძალება.

On.ge შეეცადა მკითხველისთვის მოკლედ აეხსნა, რა იცვლება ხვალიდან.

გადაადგილება

დღის განმავლობაში ქუჩაში გადაადგილება აკრძალული არ არის, თუმცა რეკომენდაციაა, რომ მაქსიმალურად ვერიდოთ და აუცილებელი შემთხვევების გარდა, გარეთ არ გავიდეთ. თუმცა, ყველა შემთხვევაში აუცილებელია, გვქონდეს პირადობის მოწმობა.

დღის განმავლობაში სახლიდან გასვლა აკრძალულია მხოლოდ 70 წელზე ზემოთ მოქალაქეების. ისინი გადაადგილებას შეძლებენ მხოლოდ იმ შემთხვევაში, როცა მიდიან უახლოეს სასურსათო მაღაზიებში, უახლოეს აფთიაქში ან უახლოეს სამედიცინო დაწესებულებაში. იმ შემთხვეევაში, თუ ხანდაზმული მოქალაქეები არიან მარტოხელები, ეკონომიკის სამინისტრო, ჯანდაცვის სამინისტრო და ადგილობრივი მუნიციპალიტეტები ვალდებულები არიან დაეხმარონ მათ.

ამასთან, ყველასთვის აკრძალულია სამ ადამიანზე მეტის შეკრება, თუ გარდა სასურსათო მაღაზიებისა და აფთიაქებისა, სადაც სავალდებულოა დავიცვათ ორმეტრიანი დისტანცია.

რაც შეეხება ღამეს, 21:00 საათიდან დილის 06:00 საათამდე, ნებისმიერი სახის გადაადგილება იკრძალება.

გამონაკლისი იქნებიან მხოლოდ ის ადამიანები, რომლებიც ამ დროს მუშაობენ და მათზე დაიშვება საშვები. ამ საშვების გარეშე ღამის საათებში გადაადგილებას ვერავინ შეძლებს.

ტრანსპორტი

სრულიად იკრძალება ნებისმიერი ტიპის საზოგადოებრივი ტრანსპორტით მგზავრობა, მათ შორის, მეტროთი. შეზღუდვა ეხება როგორც ქალაქებსა და მუნიციპალიტეტებს შიგნით, ასევე, ქალაქებს შორის გადაადგილებას.

დასაშვებია მხოლოდ მსუბუქი ავტომობილებით, მათ შორის ტაქსით მგზავრობა მხოლოდ იმ შემთხვევაში, თუ მანქანაში იქნება მხოლოდ სამი ადამიანი, მათგან ორი კი უკანა სავარძელზე იჯდება. გარდა ამისა, მანქანის ფანჯრები არ უნდა იყოს დახურილი.

მგზავრების გადაყვანა დასაშვებია მხოლოდ სტრატეგიული მნიშვნელობის ობიექტების თანამშრომლების შემთხვევაში, ესეც უნდა იყოს ორგანიზებული და უსაფრთხო.

რაც შეეხება იმ ადამიანებს, რომლებიც სამსახურში წასასვლელად საზოგადოებრივ ტრანსპორტს იყენებენ, მათი გადაადგილება, შესაძლოა, დამსაქმებელმა უზრუნველყოს.

სამსახური

დასაქმებულების დიდი ნაწილი იმუშავებს დისტანციურად. იმ საწარმოების ნაწილს, სადაც ეს შეუძლებელია, მთავრობა საქმიანობის ნებართვას მისცემს, მაგრამ ეს უნდა მოხდეს შესაბამისი პროტოკოლის მიხედვით.

როგორც უკვე აღვნიშნეთ, სამსახურში მისვლა შესაძლებელია კერძო ავტომობილით ან ტაქსით, ასევე, შესაძლებელია, დამსაქმებელმა უზრუნველყოფს თანამშრომლების გადაადგილება.

კონტროლი

კარანტინის პერიოდში ქვეყანაში ადამიანების გადაადგილების გასაკონტროლებლად და პირველადი შემოწმებისთვის შვიდ ქალაქში საკონტროლო პუნქტები მოეწყობა. ეს პუნქტები იქნება თბილისში, ქუთაისში, ბათუმში, რუსთავში, ფოთში, ზუგდიდსა და გორში. პრემიერ-მინისტრის თქმით, ეს ამ ქალაქების ადმინისტრაციული საზღვრების კონტროლისთვის კეთდება.

გარდა ამისა, შინაგან საქმეთა სამინისტროს წარმომადგენლები მთელი ქვეყნის მასშტაბით გააკონტროლებენ კარანტინის წერების დაცვას.

ქვეყანაში კარანტინი საგანგებო მდგომარეობის მოქმედებამდე, ანუ 21 აპრილამდე იქნება.

თუ მოქალაქეები აკრძალვებს არ დაემორჩილებიან, 3 ათას-ლარიანი ჯარიმა დაეკისრებათ, განმეორებით შემთხვევაში კი სისხლისსამართლებრივი პასუხისმგებლობა და თავისუფლების აღკვეთა. უფრო მაღალია ჯარიმა იურიდიული პირების შემთხვევაში — 15 ათასი ლარი.

ბოლო მონაცემებით, საქართველოში კორონავირუსით ინფიცირება დაუდასტურდა 100 ადამიანს, მათგან 18 გამოჯანმრთელებულია. კარანტინის რეჟიმშია 4 978 ადამიანი, ხოლო სტაციონარში მეთვალყურეობის ქვეშ — 266.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: