პარტნიორობამ ადამიანის უფლებებისთვის (PHR), ნინოწმინდის პანსიონის ყოფილი აღსაზრდელებისთვის კომპენსაციის განსაზღვრის მოთხოვნით სასამართლოს მიმართა.

ორგანიზაცია ნინოწმინდის პანსიონის ყოფილი და ამჟამინდელი აღსაზრდელების უფლებების დასაცავად 2021 წლიდან მუშაობს. 2021 წელს ნინოწმინდის პანსიონის აღსაზრდელების დაცვის მიზნით, ორგანიზაციამ გაეროს ბავშვის უფლებათა კომიტეტს მიმართა. 2024 წელს კომიტეტმა გადაწყვეტილება მიიღო და ორგანიზაციის მიერ გაგზავნილი მტკიცებულებების საფუძველზე დაადგინა, რომ ნინოწმინდის პანსიონში ბავშვები ძალადობის მსხვერპლები იყვნენ.

კომიტეტის გადაწყვეტილებით, სახელმწიფოს მთელი რიგი ღონისძიებების გატარება დაევალა. როგორც PHR Facebook გვერდზე წერს, აღსაზრდელების ნაწილმა უარი განაცხადა ინდივიდუალური გასაჩივრების შესაძლებლობის გამოყენებაზე, რაც, ორგანიზაციის შეფასებით, გამოწვეულია მათთვის სათანადო სერვისების დეფიციტითა და სახელმწიფოს მხრიდან მიღებული ინფორმაციის სიმწირით.

ორგანიზაცია მიიჩნევს, რომ კომპენსაცია ყველა იმ აღსაზრდელმა უნდა მიიღოს, ვისზეც გადაწყვეტილება ვრცელდება. ამ მოთხოვნით, ორგანიზაციამ უკვე მიმართა "სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს".

რაც შეეხება, იმ ყოფილ აღსაზრდელებს, რომლებმაც გამოთქვეს კომპენსაციის მიღების სურვილი, ორგანიზაციამ მათი უფლებების დასაცავად სარჩელი თბილისის საქალაქო სასამართლოში წარადგინა.