გარემოს დაცვისა და სოფლის მეურნეობის მინისტრის, ლევან დავითაშვილის განცხადებით, სტანდარტების დაკმაყოფილების შემთხვევაში აგრარული ბაზრები მუშაობას გააგრძელებს. ამის შესახებ მან ბრიფინგზე განაცხადა.

როგორც მინისტრმა განმარტა, შესაბამისი სტანდარტები სურსათის ეროვნულმა სააგენტომ უკვე დაამტკიცა და ყველასთვის ხელმისაწვდომია.

ლევან დავითაშვილის ამბობს, რომ აგრარული ბაზრების დახურვა ვირუსის გავრცელების მაღალ რისკს უკავშირდებოდა. რაც შეეხება გასათვალისწინებელ რეკომენდაციებს, მინისტრი განმარტავს, მოვაჭრე პერსონალს სპეციალური დამცავი საშუალებები უნდა ჰქონდეს, უნდა იყოს დაცული ჰიგიენური და სანიტარული პირობები და ადგილზე უნდა იყოს სანიტარული საშულებები.

გარდა ამისა, ბაზრის ადმინისტრაციამ უნდა მოიძიოს მოვაჭრე პერსონალის კონტაქტები და ინფორმაცია, რათა მიკვლევადი იყოს ვისთან ჰქონდათ მათ კონტაქტი და სად მოძრაობდნენ. ამასთან, აგრარულ ბაზრებში ვაჭრობისთვის შეზღუდვებია დაწესებული 70 წელს გადაცილებული და კონკრეტული დაავადებების მქონდე პირებისთვის.

სეს-ის მიერ დამტკიცებულ სტანდარტში გათვალისწინებულია ვაჭრობის წესები, დახლებს შორის დისტანცია და მოვაჭრეების ორგანიზება.

"ყველა ის გადაწყვეტილება, რომელსაც საკოორდინაციო საბჭო იღებს, არის აუცილებელი საჭიროებიდან გამომდინარე, რომელიც გულისხმობს ჩვენი მოსახლეობის ჯანმრთელობის დაცვაზე ზრუნვას", — განაცხადა მინისტრმა.

დღეიდან, 7 აპრილიდან თბილისის აგრარული ბაზრები დაიკეტა. გუშინ ცნობილი გახდა, რომ სამეგრელოში სენაკისა და ზუგდიდის აგრარული ბაზრები დაიხურა. სახელმწიფო რწმუნებულმა, ალექსანდრე მოწერელიამ განაცხადა, რომ ზუგდიდის ბაზრის დახურვას არ აპირებდნენ, თუმცა მათ რეკომენდაციების გათვალისწინება ვერ მოახერხეს.

საქართველოში კორონავირუსით ინფიცირების 7 ახალი შემთხვევაა და ჯამში ინფიცირებულთა რაოდენობა 195-მდე გაიზარდა.

დადასტურებულ შემთხვევებს შორის გამოჯანმრთელებულია 39 ადამიანი. ინფიცირებულებს შორის კი გარდაცვლილია 2 პირი. კარანტინის რეჟიმში 4 735 პირი რჩება, ხოლო, სტაციონარში მეთვალყურეობის ქვეშ 383 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: