მარნეულში მერიასთან ხალხმრავლობა იყო, ადგილზე შეკრებილი ათეულობით მოქალაქე დახმარებას ითხოვდა. შესაბამისი ვიდეო მასალა რადიო მარნეულმა გაავრცელა. მარნეულის მერმა, ზაურ დარგალმა აღნიშნა, მერიის სოციალური დახმარება კონკრეტული ჯგუფებისთვის იყო განსაზღვრული, თუმცა ადგილზე სხვადასხვა საჭიროების მოქალაქეები მივიდნენ.

"სამწუხაროდ, ხდება ისე, რომ მოსახლეობაში ავრცელებენ ინფორმაციას, თითქოს დახმარება ყველამ უნდა მიიღოს. ეს დახმარება არის გარკვეული ჯგუფებისთვის, ჩვენ ვიცით, სიები გვაქვს, მოვალთ ყველა ოჯახში, ყველას დავეხმარებით. ძალიან გთხოვთ, როგორც სთხოვეს სამი კვირის წინ იტალიის მერებმა, დარჩით სახლებში, არ დატრიალდეს ის რაც მოხდა იტალიაში", — თქვა ზაურ დარგალმა.

მერიის წინ შეკრებილი მოქალაქეების დაშლას და დისტანციის დაცვას მერიის ზედამხედველობის სამსახურის თანამშრომლები ცდილობდნენ. მოქალაქეებს ქვემო ქართლის გუბერნატორმა, მიშა რეხვიაშვილმა აუხსნა რა პრინციპით ნაწილდება დახმარება. მოგვიანებით კი მათ სახლში წასვლისკენ მოუწოდეს.

კორონავირუსის გავრცელების გამო ქვეყანაში საგანგებო მდგომარეობაა გამოცხადებული და სხვადასხვა აკრძალვაა დაწესებული, მათ შორის აკრძალულია 10-ზე მეტი ადამიანის შეკრება. მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყვეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ბოლო მონაცემებით, საქართველოში კორონავირუსით ინდფიცირებულთა რაოდენობა 98-მდე გაიზარდა, მათგან 18 გამოჯანმრთელებულია. კარანტინის რეჟიმშია 4 978 ადამიანი, ხოლო სტაციონარში მეთვალყურეობის ქვეშ — 266.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: