სოფლის მეურნეობის მინისტრის, ლევან დავითაშვილის თქმით, სამინისტრო 24 საათიან რეჟიმში აგრძელებს მუშაობას, რომ არ შეიქმნას სურსათით თუ სხვა პირველადი საჭიროების პროდუქციით მომარაგების პრობლემა. ამის შესახებ მინისტრმა სპეციალურ ბრიფინგზე ისაუბრა.

"ჩვენ 24 საათიან რეჟიმში ვაგრძელებთ მუშაობას, მათ შორის სამინისტროში არსებობს კორონავირუსთან ბრძოლისთვის კოორდინაციის მინი შტაბი, ვართ კავშირზე ყველა შესაბამის უწყებასთან იმისთვის, რომ ის მიმართულება, რომელზეც პასუხისმგებლობა გვაკისრია შესრულდეს შეფერხების გარეშე", — თქვა ლევან დავითაშვილმა.

მინისტრმა აღნიშნა, რომ მარნეულისა და ბოლნისის მუნიციპალიტეტში, სადაც მკაცრი საკარანტინო ზონაა, პროდუქციის შეტანა ხდება ორგანიზებულად, ჯანდაცვის ორგანიზაციის რეკომენდაციების დაცვით.

ბოლო მონაცემებით, საქართველოში კორონავირუსით ინფიცირებულთა რაოდენობა 67-მდე გაიზარდა. მათ შორის გამოჯანმრთელებულია 8 ადამიანი. კარანტინის რეჟიმში იმყოფება 4 055 ადამიანი, ხოლო სტაციონარში მეთვალყურეობის ქვეშ — 252.

კორონავირუსი საქართველოში: საგანგებო მდგომარეობა და საკარანტინო რეჟიმი

კორონავირუსის გავრცელების გამო ქვეყანაში საგანგებო მდგომარეობაა გამოცხადებული და სხვადასხვა აკრძალვებია დაწესებული, მათ შორის აკრძალულია 10-ზე მეტი ადამიანის შეკრება.

მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყვეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ჯანდაცვის სამინისტროს დაევალა, მარნეულსა და ბოლნისში დაიწყოს ტესტირების სპეციალური პროგრამა. ჯანდაცვის მინისტრის თქმით, სწრაფი ტესტები ქვეყანაში ხვალიდან შემოვა.

გარდა ამისა, მთავრობის გადაწყვეტილებით, საქალაქთაშორისო გადაადგილება აიკრძალა ყველა სახის ტრანსპორტით, გარდა პირადი ავტომობილებისა. თბილისის მერიის გადაწყვეტილებით კი შეზღუდვები დაწესდა ტაქსებზე. კერძოდ, მხოლოდ 2 მგზავრის გადაყვანა შეიძლება უკანა სავარძლებზე და ფანჯრები უნდა იყოს ღია.

დღეს, 23 მარტს ცნობილი გახდა, რომ მთავრობის განკარგულებით, საქართველოს ავიახაზები 2 კვირის განმავლობაში მსოფლიოს 6 ქალაქიდან ჩამოიყვანს მგზავრებს. მთავრობის მოთხოვნით, ბილეთის ფასი არ უნდა აღემატებოდეს €199-ს.

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა. კერძოდ:

გარდა ამისა, როგორც კერძო, ისე საჯარო სექტორს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: