სინდისის პატიმრების ოჯახის წევრები განცხადებას ავრცელებენ, სადაც წერენ, რომ "ყველაფერი, რაც შეიძლება ანაწევრებდეს პროტესტს ან იწვევდეს გაურკვევლობას, ეწინააღმდეგება მათ მიზნებს და ემსახურება მტრის ინტერესებს".

მათ მიერ გავრცელებულ წერილს სრულად გთავაზობთ.

"პირველ რიგში, უდიდეს მადლობას გიხდით ყველას მხარდაჭერისთვის.

უსაზღვროა ჩვენი მადლიერება პროტესტის ყველა იმ მონაწილის მიმართ, ვინც ვერაფრის დიდებით გატეხა რეჟიმმა, ძალადობის, დაშინების, ზეწოლის, რეპრესიებისა და ფიზიკური განადგურების რისკის მიუხედავად.

მართალია, ბიჭებმა ერთმანეთი მხოლოდ დაკავების შემდეგ გაიცნეს, სასამართლო სხდომის დარბაზებსა და ციხის საკნებში, მაგრამ უპირობოა მათი პატივისცემა, თანადგომა და სიყვარული ერთმანეთის მიმართ.

სწორედ ამიტომ, მიგვაჩნია, რომ ყველაფერი, რაც შეიძლება ანაწევრებდეს პროტესტს ან იწვევდეს გაურკვევლობას, ეწინააღმდეგება ჩვენს მიზნებს და ემსახურება მტრის ინტერესებს.

ჩვენი ერთ-ერთი მთავარი მიზანი და სურვილი, კი, ისეთ სახელმწიფოში ცხოვრებაა, სადაც სამართლიანი სასამართლო უზრუნველყოფილი იქნება განურჩევლად ყველასთვის.

ჩვენი ამ სურვილებისა და მიზნების გასაჟღერებლად, შესანიშნავ დღედ მიგვაჩნია საქართველოს დამოუკიდებლობის დღე — 26 მაისი.

გახსოვდეთ, ჩვენი წარმატების ფორმულა, ჩვენს გერბზეა დატანილი — ძალა ერთობაშია", — ნათქვამია განცხადებაში, რომელიც გამოქვეყნდა გვერდზე "სინდისის პატიმრების თავისუფლებისთვის".

შეგახსენებთ, რომ სინდისის პატიმრების ოჯახის წევრების მიერ გავრცელებული წერილი ორგანიზაცია "დაფიონის" მიერ სინდისის პატიმრების სახელით გავრცელებულ წერილს მოჰყვა, რომელმაც საზოგადოებაში არაერთგვაროვანი რეაქცია გამოიწვია.

წერილში, რომელსაც 17 სინდისის პატიმარი აწერს ხელს წერია, რომ მათთვის მიუღებელია კონკრეტული პოლიტიკოსების ფოტოების გამოყენება პროტესტზე. ამას გარდა, ისინი მოითხოვენ, რომ "კონკრეტულმა ჯგუფებმა თავი შეიკავონ ისეთი შინაარსის ბანერებისგან, რაც იწვევს პროტესტს წევრებს შორის, დისონანსს და პროტესტის დისკრედიტაციას" და "ოპოზიციამ მკაფიო უარი განაცხადოს ადგილობრივი თვითმმართველობის არჩევნებში მონაწილეობაზე".

21 მაისს, ბორის ჩელე ყურუამ სოციალურ ქსელში დაწერა, რომ ციხეში სინდისის პატიმარი ზვიად ცეცხლაძე მოინახულა, რომელმაც უთხრა, რომ 20 მაისს საპატიმროდან გავრცელებული სინდისის პატიმრების მიერ გავრცელებული განცხადების ტექსტი მან დაწერა, შემდეგ კი 16-მა სინდისის პატიმარმა მოაწერა ხელი.