გერმანიის ელჩმა, პეტერ ფიშერმა, 18 მაისს, ბათუმში მასზე მომხდარ თავდასხმაზე კომენტარი "ტვ პირველთან" გააკეთა. მან მადლობა გადაუხადა ყველას სოლიდარობისთვის და აღნიშნა, რომ ასეთი ინციდენტები ვერ მოახდენს გავლენას საქართველოს და გერმანიის ურთიერთობაზე.

"ბათუმში ჩვენ თევზის ბაზრის სიახლოვეს გადავადგილდებოდით, ჩემს მეუღლესთან ერთად, სხვათა შორის. მოულოდნელად, ვიღაც ბიჭი გამოჩნდა და ყვირილი დამიწყო. ჩვენ ქართველებთან ერთად ვიყავით. მათ უთხრეს, რომ გაჩუმებულიყო და წასულიყო. ქართველების გვერდით დგომამ ძალიან გამახარა, მას არავინ შეუერთდა და 6-7-მა ადამიანმა უთხრა, რომ ადგილი დაეტოვებინა და ისიც წავიდა.

მე მადლობელი ვარ სოლიდარობის მესიჯებისთვის. ასეთი ინციდენტები ვერ მოახდენს გავლენას საქართველოს და გერმანიის ურთიერთობაზე. უნდა ითქვას, რომ ჩვენი მეგობრობა ახლა პრობლემურია, მაგრამ ჩვენი მეგობრობის შემოთავაზება ძალაშია. მინდა ვთქვა, რომ პარტნიორობას ორი მხარე სჭირდება. ჩვენ პოზიცია არ შეგვიცვლია. ჩვენ გთავაზობთ ევროკავშირის წევრობას. 20 წელია ჩვენ კარგი პარტნიორობა გვაკავშირებს და ჩვენ ამის გაგრძელება გვინდა", — აცხადებს პეტერ ფიშერი "ტვ პირველთან".

შეგახსენებთ, რომ 18 მაისს ბათუმში ვალერი ქოჩიაშვილი გერმანიის ელჩ პეტერ ფიშერს თავს დაესხა სიტყვიერი შეურაცხყოფა მიაყენა. შემთხვევა გერმანიის საელჩომაც დაადასტურა.

"საელჩო ადასტურებს ამ შემთხვევას და მადლობას უხდის იმ ქართველებს, რომლებიც შემთხვევით შეესწრნენ ინციდენტს და ამ სიტუაციაში მხარი დაუჭირეს ელჩს, როგორც მათი ქალაქის სტუმარს. მას შემდეგ, რაც ირგვლივ მდგომმა ქართველებმა ბატონ ქოჩიაშვილს მის უღირს საქციელზე მიუთითეს, მან სწრაფად დატოვა იქაურობა. პოლიცია ადგილზე არ ყოფილა", – აცხადებენ გერმანიის საელჩოში.