აქტივისტი თათია აფრიამაშვილი წერს, რომ ქართული ოცნების დეპუტატმა, მარიამ ლაშხმა უჩივლა.

"დამირეკეს. მარიამ ლაშხმა გვიჩივლა 17 მაისის თემაზე. შეურაცხყოფა მიაყენე პარლამენტის წევრსო. შევხვდებით სასამართლოში", — წერს აქტივისტი სოციალურ ქსელში.

აფრიამაშვილის თქმით, ლაშხის საჩივარი 17 მაისს მომხდარს ეხება, როცა აქტივისტები, თათია აფრიამაშვილი და მაგდა მამუკაშვილი ერთ-ერთ კაფეში მარიამ ლაშხს შეხვდნენ. აქტივისტებმა ვიდეომასალა სოციალურ ქსელში თავად გაავრცელეს. ვიდეოში ჩანს, რომ აქტივისტები ლაშხთან მიდიან და ამბობენ — "თავისუფლება რეჟიმის ტყვეებს, არა რუსულ რეჟიმს, არა რუსეთის მონებს... ძირს რუსეთის მონები“.

შეგახსენებთ, ადმინისტრაციულ სამართალდარღვევათა კოდექსში თებერვალში შესული ცვლილებით, საქართველოს სახელმწიფო-პოლიტიკური თანამდებობის პირის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით გამოიწვევს დაჯარიმებას 1500 ლარიდან 4000 ლარამდე ოდენობით ან ადმინისტრაციულ პატიმრობას 45 დღემდე ვადით.