ოცნების დეპუტატმა, ვლადიმერ ბოჟაძემ აშშ-ის სახელმწიფო მდივნის, მარკო რუბიოს განცხადებაზე გააკეთა კომენტარი.

"მას [მარკო რუბიოს] საქართველო საერთოდ არ უხსენებია. საქართველო არ არის ანტიამერიკული. თუ სადმე არის ანტიამერიკული მთავრობა და აწყობს თუ არა ეს ამერიკას, არის ამერიკის პრობლემა. ჩვენ პრობლემა არ გვაქვს. იმიტომ, რომ ჩვენ არ ვართ არც ანტიამერიკული, არც ანტიდასავლური.

...ეს შეფასება გაკეთდა იმ პროვოკაციული კითხვის საპასუხოდ, რომელიც დასვა უილსონმა. რუბიოს არ უხსენებია საქართველო, არც ქართული ოცნება. მან თქვა — სადმე თუ არსებობს ასეთი მთავრობები, მისაღებია თუ არა ამერიკისთვის, ამაზე ვიფიქრებთო. ძალიან კარგი, იფიქრონ. რა აწყობს ამერიკას, რა — არა, ეს გაარკვიოს ამერიკამ, ჩვენ გვაწყობს ის, რაც აწყობს საქართველოს. ...რუბიო ვის რას გადაახდევინებს, ეს არის რუბიოს საქმე და არა ჩვენი", — თქვა ბოჟაძემ ფორმულასთან საუბრისას.

21 მაისს, აშშ-ის კონგრესის ქვედა პალატის, წარმომადგენელთა პალატის საგარეო საქმეთა კომიტეტის სხდომაზე აშშ-ის სახელმწიფო მდივანმა, მარკო რუბიომ ქართული ოცნების მთავრობა "ანტიამერიკული მთავრობის" კონტექსტში მოიხსენია.

მას "MEGOBARI აქტის" თანაავტორმა, კონგრესმენმა ჯო უილსონმა საქართველოსთან დაკავშირებით კითხვა დაუსვა,

"200 დღეა, თავისუფლების მოყვარე ქართველები ყოველდღე გმირულად გამოდიან ქუჩაში, უჭირავთ ამერიკის დროშები, თან ატარებენ პრეზიდენტის [ტრამპის] ფოტოებს. თქვენი ხელმძღვანელობით, რა იქნება გაკეთებული, რათა სახელმწიფო დეპარტამენტმა ნამდვილი ფასი გადაახდევინოს ანტიამერიკულ ქართულ ოცნებას ქართველი ხალხის სახელით?" — ჰკითხა ჯო იულსონმა ("რადიო თავისუფლებას" თარგმანი).

რუბიომ უპასუხა, რომ თეთრი სახლი ასე განიხილავს ამ საკითხს — არის მათი "ინტერესი, რომ არსებობდეს ანტიამერიკული მთავრობა, რომელიც ხელისუფლებაშია მსოფლიოს მნიშვნელოვან ნაწილში? და თუ არა, ჩვენ მივიღებთ შესაბამის ზომებს, რათა ამ მთავრობამ ფასი გადაიხადოს".

"დავუბრუნდები იმას, რაც ადრე ვთქვი, — [უპირველესია] აშშ-ის მიზნები, ჩვენი ეროვნული ინტერესები. ასე რომ, ჩვენ ასე განვიხილავთ ამ საკითხს: "არის ჩვენი ინტერესი, რომ არსებობდეს ანტიამერიკული მთავრობა, რომელიც ხელისუფლებაშია მსოფლიოს მნიშვნელოვან ნაწილში? და თუ არა, ჩვენ მივიღებთ შესაბამის ზომებს, რათა ამ მთავრობამ ფასი გადაიხადოს.

ეს საკითხი ამჟამად განხილვის პროცესშია და ჩვენ განვიხილავთ ვარიანტებს და დამატებით ვარიანტებს. დღეს კონკრეტულად რას ვგეგმავთ, ჯერჯერობით ვერ გამოვაცხადებ. თუმცა, შემიძლია გითხრათ, რომ ეს არის საკითხი, რომელიც განიხილება.

კიდევ ერთხელ, ეს შესანიშნავი მაგალითია იმისა, თუ რატომ ვაპირებთ, მივმართოთ ჩვენს რეგიონულ ბიუროებსა და ადგილობრივ ოფისებს ადგილზე, რათა მათ მოგვცენ რეკომენდაციები იმის შესახებ, თუ ყველაზე მეტად რა ზომებზე ექნება მთავრობას — ანტიამერიკულ მთავრობას — რეაგირება", — განაცხადა რუბიომ ("რადიო თავისუფლებას" თარგმანი).

ცნობისათვის, ეს იყო პირველი განცხადება, რომელიც აშშ-ის სახელმწიფო მდივანმა, მარკო რუბიომ საქართველოსთან დაკავშირებით გააკეთა.